26. 5. 2022: Русиньскы реґіоны одпрезентують ся в Кошіцях

Як інформовав Мартін Караш, председа Русиньской оброды на Словеньску, орґанізація приготовила серію културно-сполоченьскых подій з назвов Русиньскы реґіоны в містї.

Найближе з русиньсков културов з реґіонів можете стрїтити ся в Кошіцях в неділю 29-го мая 2022-го року в просторах центра Южан.

Ідеёв новой серії подій є, жебы в містах выходной Словакії презентовали ся русиньскы умелц і колектівы з реґіонів северовыходной Словакії, котры суть населены Русинами. В недїльніїм проґрамі, котрый буде за словами орґанізатора повный русиньского слова, музикы і танця, одпрезентують ся Барвінок із Камюнкы, Любовнян із Старой Любовні, Вородай з Великого Липника і Майдан з Літмановой.

Тїшыти ся можете і на солістів-співаків і декламаторів з окресу Стара Любовня. Модеровати подія буде Наталія Гребікова, редакторка русиньской редакції Народностно-етнічного высыланя Радія і телевізії Словакії в Кошыцях.

„В окресї Стара Любовня є велика часть сел з населінём по русиньскы бісїдуючім, котре доднесь сохранять собі язык, церьковны і світьскы звычаї а традіції своїх предків. Жытелї тых сел суть векшынов віруючі восточного, візантійского обряду. І тоты атрібуты русиньской културы на Словакії будуть презентованы на події Русиньскы реґіоны в містї,“ додавать Мартін Караш, котрый за орґанізаторів сердечно запрошать на акцію до Кошіць.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.

Жрідло фотоґрафії: Піотр Басалыґа.