26. 5. 2021: Недожытых 90 років русиньского маляря ІВАНА НЕСТОРА ШАФРАНКА з Пряшова

Іван Нестор Шафранко народив ся 26. мая 1931 у селї Туря Пасіка на Підкарпатю. Він быв главно малярём і сохарём, быв довгорічным учітелём малёваня на тогдышнїй  Універзітї П. Й. Шафарика в Пряшові. Скінчів Руську ґімназію в Гуменнім (1951) і Академію вытварных умень у Празї (1957). По скінчіню штудій вернув ся на выходну Словакію а од 1960 року зачав учіти на спомянутій універзітї (доцентом став у 1976 роцї, професором у 1997 роцї), де быв і моїм учітелём.

У творчости І. Н. Шафранка домінують фіґуралны композіції, намалёваны олїёвымы фарбами, котры він часто споёвав з іншыма техніками. Він робив і в жанрї керамічной мозаікы і малёваного смалту, функціоналной пластикы з тенденціов до абстрактного уменя. І. Н. Шафранко знамый як концептуалный експеріментатор, котрый ся снажыв споёвати умелецькы средства, роблячі з фотоґрафіёв і текстовым матеріалом. Выставляв на многых колектівных і персоналных выставках на Словакії і в загранічу. Ёго образы суть у ґалеріях по цїлій Словакії і в Нїмецьку, Данії, Польщі ітд.

Як сімпатізант русиньского возродного руху по 1989 роцї І. Н. Шафранко брав участь на вшыткых выставкых русиньскых вытварных умелцїв, орґанізованых Русиньсков обродов, в тім чіслї і на міджінародній выставцї русиньскых малярїв у Шаріській ґалерії в рамках Світового конґресу Русинів у 2003 роцї в Пряшові. 

Умер 1. 11. 2020 у Пряшові. Вічная ёму память!

-аз-