26. 1. 2021: Лїто было в музеях і ґалеріях ПСК успішне наперек коронакрізї
Музеї і ґалерії в Пряшівскім самосправнім краю (ПСК) фунґовали влони з причіны пандемії в обмедженім режімі. То было відїти і на цїлковій навщівности за цїлый рік. Но наперек скорочіню часу, коли было мож културны інштітуції навщівити, веце з них зазначіло рекорды главно в лїтнїх місяцях.
Як інформовала Леа Геілова з Оддїлїня комунікації і пропаґації ПСК, навщівность музеїв і ґалерій, котрых зряджователём є край, была позначена рештрікціями в повязаню з пандеміёв. Жупны музеї і ґалерії навщівило понад 357 тісяч людей, но в порївнаню з роком 2019 є то о веце як 188 тісяч навщівників менше.
Наперек тому дакотры културны інштітуції записовали і рекорды.
Любовняньскый музей – замок в Старій Любовнї у 2020-ім роцї навщівило главно вдяка успішным лїтнїм місяцям, коли наросла навщівность о 40 процент, довєдна поад 200 тісяч людей. Минулорічна навщівность того музея представлює веце як половину цїлковой навщіности вшыткых музеїв і ґалерій, котрых зряджователём є ПСК.
Прязна лїтня сезона была і в далшых крайскых музеях. В лїтнїх місях дішло ку перекрочіню навщівности в порівнаню з 2019-ым роком і в Музею модерного уменя Енді Варгола в Меджілабірцях. У Варголовім музею так само як в Любовняньскім музею наросло чісло навщівників о 40 процент. Довєдна у 2020-ім роцї пришло до той інштітуції веце як 21,5 тісяч турістів.
Вігорлатьскый музей в Гуменнім оцїнив лїтню турістічну сезону в місяцях юл – авґуст 2020-го року за найуспішнїшу в своїй історії. В лїтї в музею было 12 800 навщівників, цїлково за рік їх было 17 тісяч. О 11 процент нароснутя зазначів і Крайскый музей в Пряшові.
Шарішскый музей в Бардеёві было собі посмотрити понад 33 тісяч заінтересованых. Музей в Кежмарку мав майже 32 тісяч навщівників, і до Підтатраньского музею в Попрадї завітало понад 5 700 людей.
Татраньска ґалерія в Попрадї зазначіла понад 8300, Шарішска ґалерія в Пряшові веце як 6 600 навщівників.
Петро МЕДВІДЬ, ЛЕМ.фм, языкова управа: ред. АРК в СР.