25. 8. 2021: В Лютинї собі припомянули 170-ту рочніцю зъявіня св. Николая

На головній архієрейскій літурґії проповідав архієпіскоп метрополіта Євген Поповіч.

В днях 21-го і 22-го авґуста 2021-го року в найвекшім путницькім місцї ґрекокатоликів на Словакії – в Лютинї, одбыв ся архієпархіалный одпуст. Тогорічный одпуст быв святкованый з нагоды 170-ой рочніцї зъявіня св. Николая бідній лютиньскій вдові Зузанї Фекете.

Як інформовав Михал Павлишіновіч, говорця Пряшівской архієпархії, главным служытелём недїльной архієрейской літурґії быв пряшівскый архієпіскоп метрополіта Йоан Бабяк. Проповідь мав архієпіскоп метрополіта перемышельско-варшавскый Євґен Поповіч. На торжестві в Лютинї привітали і братїславского єпарху, владыку Петра Руснака (вшыткы троє на фотоґрафії вправо).

Бісїдовало ся і о навщіві Папы

Владыка Євґен у своїй проповідї в недїлю спомянув і очековану навщіву Папы рисмкого Франціска в Пряшові, де буде мати стрїчу з ґрекокатолицькыма віруючіма, і одслужыть Божеску літурґію св. Йоана Златооустого.

„Означів єй (стрїчу. позн. редакції) за праздник нашой віры, в котрім будеме дяковати Найвысшому і просити го о благословлїня про каждого з нас, про нашы парохії і про цїлу метрополію до слїдуючіх років, жебы сьме завзято розвивали скарбы нашой віры і передавали їх єден другому як ґаранцію нашого вічного щастя,“ інформовав Павлишіновіч.

О навщіві Вселеньского Архієрея бісїдовав у проповіді і архієпіскоп Йоан почас літурґії, котру одправляв в суботу вечур в лютиньскій базиліці мінор.

Метрополіта „припомянув навщіву Святішого Отця Франціска в Пряшові, котра ся ближыть, і повзбудив віруючіх, жебы ся духовно приготовили на тоту історічну дїю, і з радостным сердцём очековали сполочне торжество святой літурґії з Папом Франціском,“ пише говорця архієпархії.

Одпуст опередила триднёва духовна приправа од середы до пятніці, котру в окремых днях вели членове монашескых общін, якы дїють в Ґрекокатолицькій церькви на Словакії. З пандемічных причін і тот рік одпуст проходив лем на реґіоналній уровни.

Зъявіня св. Николая

Традіція одпустів у Лютинї зачала в половинї 19-го столїтя. На праздник Преображенія подля юліаньского календаря, 19-го авґуста 1851-го року, жытельці Лютины Зузанї Фекере зъявив ся св. Николай.

По повторяных зъявінях поставили віруючі на лютиньскій горї крест. Як доказ зъявінь подаровав св. Николай Зузанї Фекете ікону Пресвятой Богородіцї, котру мала дати духовному отцёви як дар до будучой каплічкы.

Папа римскый Пій IX. выдав 24-го мая 1855-го року декрет о можности прияти в Лютинї церьковны індулґенції (одпусткы). У 1988-ім роцї быв храм в Лютинї выголошеный Папом римскым Йоаном Павлом ІІ. за базиліку мінор. У 2010-ім роцї была Базиліка Успенія Пресвятой Богородіцї причленена окремым звязком духовной близкости ку Базиліцї Santa Maria Maggiore в Римі, з прівілеґіёв повноміцных індулґенцій.

Петро МЕДВІДЬ, ЛЕМ.фм, ґрафічна і языкова управа: ред. АРК в СР.