25. 10. 2018: Невиноваты

В ночі на 20-го октобра 2018 обявилиявили ся в Закарпатьскій области Україны білборды. Ніт, не пропоновали ани туньше телефонованя, ани лїпшу пожычку в банцї. Свідчіли о тім, де веде політіка Києва в тій области.

Двадцять білбордів, як писали україньскы медії, на котрых были фотоґрафії трёх політіків мадярьской меншыны, давалo ясный одказ: Заставиме сепаратістів! Шкандал, і думам, же є то іщі слабе слово, коментовав міністер загранічных дїл Україны Павло Клімкін, ці голова Закарпатьской областной адміністрації Геннадій Москаль, котрый за білбордами видїв російску безпеку ФСБ. Вшыткы мыють рукы, говорить ся о тім, же білборды были зроблены нелеґално, не є виноватого, окрем російской безпекы.

О пару днїв по тім в рамках Варшавского безпечностного форуму міністер загранічных дїл Мадярьска Петер Сіярто пропонує Павлови Клімкінови договор о охранї народностных меншын і говорить о тім, же довіра меджі тыма двома державами мусить быти обновлена. Пропонують ся і грошы на будованя драг в Закарпатьскій области Україны. Подля думок Сіярта є в інтересах Будапешту, жебы конфлікт далше не продовжовав. Києв обіцять пороздумовати над пропозіціёв.

Меджі тыма подіями, котры за остатнїй час одбыли ся, і котры суть повязаны із Закарпатьсков областёв, Карпатьска січ публічно позывать на свої планованы події, їй представителї пошырюють на своіх профілах на сітїі Facebook різны фотоґрафії стрїч, походїв. Фотоґрафії, на котрых мають членове закрыту тварь, бігають зо збройов і „тренують“ молодых людей, фотоґрафії, котры нияк не різнять ся од фотоґрафій іншых неонацістічных ґруп будьде в Европі. З тов різніцёв, же в Европі суть такы орґанізації мімо закона, на Українї Карпатьску січ офіціално лем одзброїли.

Не думам, же якыйсь договор, котрый теперь пропонує Будапешт, быв зробленый із дня на день, но думам, же ёго публікованя могли ускорити і остатнї події на Українї – главно споминаны білборды. І пропозіція договору о охранї народностных меншын є правилна. Бо якраз справованя ся Україны односно народностных меншын є жрідлом того, што видиме в остатнім часї. Про мене в тім моментї не є основным, хто конкретно стоїть за шкандалозныма білбордами, основным є задумати ся, хто тому приготовив уроджайну землю, жебы то мож было схосновати.

Тоту уроджайну землю довгодобо приготовлює якраз політіка Києва. Неберучі до увагы теперь цїлу теріторію Україны, а лем Закарпатьску область, є справованя ся державы в области народностных меншын далеко од будьякых европскых штандардів. Докінця таке справованя ся не є лем в области народностных меншын, бо задумати ся треба обще над характером державы і над тым, ці то є правна держава.

Приклады суть знамы і стораз повторяны. Україна предці зачала свою путь в рамках Закарпатьской области переступлінём властных норм і приобіцянь, кедь по успішнім референдумі не выповнила волю народа на автономію. Києв сістематічно продовжовав у нищіню русиньской народности продовжованём насилной українізації, непризнанём прав Русинам. По бою із Русинами пустив ся до далшых меншын, в Закарпатьскій области Україны до Мадярів. Припомяньме собі, же „проблемы“ не зачали роздаванём мадярьскых паспортів і відеозаписом із конзулату. Тото вшытко зачало атаками на канцеларії мадярьскых політіків, побігованём Карпатьской січі по закарпатьскых уліцях, пропозіціями тіпу, же треба уліцю войнового злочінця Шухевіча (найновше уж треба в Ужгородї і уліцю Бандеры), продовжовало языковым законом ці законом о освітї.

І так ся вертаме ку вопросу, хто за білбордами стоїть. Білборды суть ефект засіяного. Білборды суть лем насїня, котре ся ухопило і теперь вказало зо земли. Но сіяв Києв і порядно гноїв тоту землю, жебы быв уроджай, дакілько років і многыма способами. І є абсолутно єдно, хто конкретно білборды зробив, бо условії на то зробив хтось іншый.

Покля хоче Україна заборонити такым і подобным шкандалам, котры бы могли быти путёв до „аду“, потім і без мадярьской пропозіції, і без довгого роздумаваня мав бы Києв переоцїнити і змінити політіку односно народностных меншын. Вшыткых. І той невызнаной. Треба орґанізації, як Карпатьска січ, котры самы страшать людей і роздувають іскеркы небезпечного огня націоналізму, поставити мімо закон і будьякы актівности такых радікалів безпрецедентно карати, намісто прославляня їх як добрых патріотів.

Треба перестати грати ся на невиноватого, перестати глядати виноватых всядыль інде лем не у себе, і прияти зодповідность за тото, што діє ся в державі. Покля тото Києв не змінить, потім є тот найвиноватїшый.

Петро МЕДВІДЬ, лем.фм

(Статя была написана як коментарь „Вступне до контроли“ лемківского радія lem.fm. Жрідло фотоґрафії: Wikipedia.)