25. 1. 2019: Засіданя ФЮЕН з пріоритетами на 2019 рік

Для орґанізациі ФЮЕН (з анґлицкого Federal Union of European Nationalities, т.є. Федерацийного Союзу Европейскых Народів) текучый 2019 рік буде дальше пріоритетово проходил з пошырюваньом проєкту Minority SafePack European Citizen’s Initiative – Европейской Соспільной Ініциятивы Minority SafePack, што оголосил заярд орґанізациі вчас першого тогорічного засіданя во Фленсбурґу в Даніі 11-12. січня/януара 2019 рока.

Minority SafePack то ініциятива, котра мат ґарантувати вшыткым языковым і нацийональным меншынам в Европі высокы стандарды хороніня іх прав, достоменности, підтримуваня культуры і вшелеякых аспектів штоденного жытя – так членів приналежачых до меншын, як і орґанізаций, котры в меншыновым просторі діют і еґзистуют. Текучый рік являт ся добром ґу тому нагодом, понеже в 2019 році будут проходити выборы до Европейского Парляменту. Прото буде то акуратный момент, жебы лоббувати з тым проєктом на рівни европейскых інституций, ци посеред урядів і власти членьскых держав Европейской Уніі.

Окрем того, орґанізация ФЮЕН деклярує, же в найблизшых европейскых выборах буде поперала і промувала кандидатів, якы декляруют свою меншынову приналежніст.Попри тым, президия ФЮЕН вказує активну підпору своім членьскым орґанізациям на Украіні в области охороны прав меншын, котры в тій державі ся фурт ся погіршают. В звязку з тыма проблемами, а і небезпеком, звязаном з міняючом ся політичном і воєнном ситуацийом на Украіні, найблизшый конґрес ФЮЕН, якого місце заплянувано спочатку на Украіні, одбуде ся в Братиславі і Дунайскій Стреді помедже 12. і 16. червця/юнія 2019 рока. Конґрес, в звязку зо своім ювілейом, представит успіхы 70-літя орґанізациі, займе ся проблемами меншын на Словациі і выбере новы власти.

Демко ТРОХАНОВСКЫЙ, лем.фм, джерело: www.fuen.org

(Публікуєме в оріґіналї – лемківскім варіантї русиньского языка.)