24. 9. 2019: Уменя Підкарпатьской Руси будуть выставлёвати в Кошіцях

Юбілей сторічніцї припоїня Підкарпатьской Руси до складу Чехословакії собі примомянуть і в Кошіцях. 2-го октобра 2019-го року ся одкрыє у Выходословацькой ґалерії експозіція під назвов Уменя Підкарпатьской Руси 1918 – 1938 / Чехословацькый слід.

Выставный проєкт, котрый приготовив куратор Мірослав Клебан, є заміряный на малярьство і скулпторство Підкарпатьской Руси в часí, коли тота теріторія творила часть новой державы. Выставку опередила научно-бадательска робота, котра занимала ся історіёв меджівойнового періоду в конфронтації з кошіцьков і европсков модернов.

 

Класіци і архівны матеріалы

Як інформує сайт Выходословацькой ґалерії в анотації ку выставці, колекіця представить навщівникам окрем класіків підкарпатьской русиньской малярьской школы як Бокшай, Ерделій ці Манайло і дотеперь менше знамых локалных авторів, котры ся рушали на сценї чеській, словацькій і підкарпатьскій.

„Окрем умелецько-історічной аналізы творів окремых авторів ся концепція буде дакус операти і о складны історічны реалности, котры формовали общественный, културный і політічный фон того реґіону. Частёв выставкы будуть і добовы фотоґрафії ці різны архівны матеріалы, котры будуть паралелно ілустровати жывот в Кошіцях і в Ужгородї, як вызначных културных центрах выходной части першой републікы,“ інформує ґалерія

 

Реакція на сторічніцю припоїня Підкарпатя

Орґанізаторы выставков реаґують на сторічніцю припоїня теріторії Підкарпатьской Руси до складу Чехословакії. Амбіціёв проєкту є подля орґанізаторів представити шырокій публіцї дотеперь мало пробадану область історії уменя і інтеґровати тым уменя Підкарпатьской школы до чехословацькой історії уменя.

„Коротка епізода сполочноой державы Чехів, Словаків і Русинів зохабьла в чехословацькім уменю (літературї і вытварнім уменю) невычеркнутельный слїд, котрого іншпірацію находимї якраз в етноґрафічнім, топоґрафічнім і фолклорнім оточіню теріторії Підкарпатьской Руси.“

Выставка має за думками орґанізаторів міцный едукачный потенціал і популарно-научным штілом представить навщівникам дотеперь мало, або нияк непрезентоване уменя в шыршых, надреґіоналных споїнях. Уменя Підкарпатькой Руси буде мож в Кошіцях видїти аж до 23-го фебруара 2020-го року.

Петро МЕДВІДЬ, ЛЕМ.фм