24. 7. 2020: В гуменьскім сканзенї зазвучать найстаршы русиньскы співанкы Марії Чокиновой

 

 

Вігорьлатьскый музей в Гуменнім вєдно із партнерами приготовлює концерт народных співанок реґіоналных фолклорістів під назвов Співанкы Марії Чокиновой (на фотцї всерединї) з Ублї.

Концерт є присвяченый єдній з найвызначнїшых інтерпреток традічных русиньскых співанок на вышнїм Земплінї  – Марії Чокиновій (1947 – 2010), із нагоды десятой рочніцї їй смерти. О концертї, котрый одбуде ся в Експозіції народной архітектіры і бываня – в сканзенї, 2-го авґуста 2020-го року зо зачатком о 16.00 год., інформовала Яна Федічова із Вігорлатьского музею в Гуменнім.

В концертнім проґрамі представлять ся солісты: Людовіт Джубак, Ванда Марінчакова, Людка Квашна, дївоча співацька ґрупа Босорочкы, мужска співацька ґрупа Гачуре, фолклорный колектів Хемлон Гуменне і дїтьскый фолклорный колектів Хемлонячік з Гуменного.

„В репертоарї выступаючіх зазвучать і співанкы, котры Марію Чокинову вовели на найвысшы позіцїї фолклорных конкурзів, а незабытнов інтерпретаціёв і до сердець їй слухачів,“ інформовала Федічова.

Чокинова почас свого актівного діяня здобылиа дакілько тітулів лавреаткы на реґіоналных фестівалах народных співанок Земплін шпіва, Маковицька струна, Співы мого роду і тітул лавреаткы в цїлодержавнім конкурзї фолклору в Баньскій Быстріцї.

Концерт в сканзенї в рамках лїтнёй понукы Вігорлатьского музею є частёв бадательско-документачного і културного діяльства музею, котре підтримує презентацію нематеріалной културной дїдовизны реґіону. Подію підпорила і Русиньска оброда на Словеньску.

Петро МЕДВІДЬ, ЛЕМ.фм, языкова управа і доданя фотоґрафії: ред. АРК в СР.