24. 4. 2023: Номінації на Pro Arte Ruthenorum 2023 одкрыты

Премія за русиньске уменя зачала уділёвати ся у 2020-ім роцї.

За інформаціёв, котру подав председа журї Націоналной премії за русиньске уменя імени Івана Манайла Pro Arte Ruthenorum – Андрій Манайло, уж было одкрыте подаваня номінацій на премію за 2023-ій рік.

Основателями премії за русиньске уменя суть Світовый конґрес Русинів і Русиньске націоналне самосправованя міста Вац в Мадярьску. Премія была основаня почас 15-го Світового конґресу Русинів, котрый у 2019-ім році проходив у Любовняньскых купелях.

Дотеперь трёми лавреаты

Премія была основана з цїлём підпоры і оцїнїня сучасных русиньскых умелцїв, котры своёв умелецьков творчостёв зробили значный вклад до розвитку і пропаґації світового русиньского уменя.

В рамках премії лавреат здобывать ґравіровану крішталёву трофей з подобов Івана Манайла, вызначного русиньского маляря, діплом і матеріалну фінанчну підпору умелецького дїятельства на суму 200 000 форінтів, што є коло 530 евр. Премія удїлює ся од 2020-го року.

О лавреатови вырїшує журї Комісії про културу Світовой рады Русинів. Першым лавреатом у 2020-ім роцї став русиньскый малярь з Підкарпатя Володимір Микита. З причіны пандемії му была премія передана аж у 2021-ім роцї.

Лавреатом за 2021-ый рік быв Владо Няряди із Сербії, а премію перевзяв за лавреата на 16-ім Світовім конґресі Русинів у Криниці Дюра Папуґа. Затля послїднїм лавреатом став у 2022-ім роцї in memoriam Штефан Телеп з Польщі. Премію почас 11-го Меджінародне бєнале лемківской/русиньской културы в Криніцї перевзяла вдова по малярьови – Олена Телеп.

Мож подати номінації

Подаваня номінацій было одкрыте на сайтї премії. Номінації можуть приходити з цїлого світа. У пропозіції на номінанта має быти ёго мено і коротка біоґрафія, обоснованя на номінацію і ілустратівный матеріал ёго тврочости. Вшыткы крітерії потрібны ку номінації мож найти на спомянутім сайтї.

Номінації мож передкладати тот рік до 31-го мая. Журї вырїшыть о тогорічнім лавреатови 30-го юна. Святочне удїлёваня Націоналной премії за русиньске уменя імени Івана Манайла Pro Arte Ruthenorum одбуде ся почас засїданя Світового конґресу Русинів, якый тот рік одбуде ся в авґустї в главнім центрї – Новім Садї.

Петро МЕДВІДЬ, ЛЕМ. фм, языкова і ґрафічна управа: АРК в СР.