24. 3. 2020: Метрополіта Іоан премєрови: В бою проти пандемії треба і духовну поміч
Словацька републіка має од суботы, 21-го марца 2020-го року, новый владный кабінет, котрый веде премєр Іґор Матовіч. Владу в суботу выменовала презідентка Словакії Зузана Чапутова.
Нова владна коаліція выникла по парламентных вольбах, котры проходили 29-го фебруара 2020-го року, і в їй складї суть штири політічны субєкты – рух OĽaNO (Obýčajní ľudia a nezávislé osobnosti – Обычайны люди і незалежны особности) премєра Іґора Матовіча, і партії Sme rodina (Сьме родина) Бориса Коллара, котрый став председом словацького парламенту, Sloboda a Solidarita (Слобода і Солідарнсть) Ріхарда Суліка і партія Za ľudí (За людей) бывшого словацького презідента Андрея Кіскы.
Нова влада ся хопила властей в якбач найскладнїшій сітуації, яку світ пережывать, кедь країны мусять боёвати ся з пандеміёв нового тіпу коронавірусу.
Премєрови заґратуловав метрополіта
Новому премєрови і владї ку выменованю своїм писмом заґратуловав в недїлю, 22-го марца 2020-го року, і владыка Іоан Бабяк, ґрекокатолицькый архієпіскоп пряшівскый, метрополіта Словакії.
„Стоїть перед вами нелегкый період боя проти пандемії, што є першов задачов влады. Наслїдно вас чекать рїшіня далшых безодкладных проблем. Выпрошую вам повность дарів Святого Духа і дар єдности при ряджіню нашой країны. Молю ся, жебы ся вам дарило позерати на добро вшыткых людей і моралне роснутя нашой сполочности, жебы вам Господь Бог благословив і хранив вас,“ пише метрополіта в писмі премєрови Матовічови.
Духовна поміч од ґрекокатоликів
Метрополіта в складных часах убезпечів нового премєра о духовній помочі, з котров може раховати од Ґрекокатолицькой церькви на Словакії.
„Проти пандемії коронавірусу будете боёвати людьскыма силами і вшыткыма людьскы доступныма средствами. Но за Ґрекокатолицьку церьков вас убезпечую і о духовній помочі, котру будете потребовати. Допроваджаме вас своїма молитвами, жертвами і постом,“ написав владыка Іоан премєрови.
В писмі далше найвысшый представитель ґрекокатоликів на Словакії дав цїлу владу Словацькой републікы під покров Пресвятой Богородіцї – Сімстрастной Дівы Марії, котра є покровительков Словакії, і в менї своїм і вшыткых єпіскопів Рады єрархів Ґрекокатолицькой церькви на Словакії владї поблагословив.
Публічны богослужіня суть дочасно позаставелны
На Словакії моментално не суть публічны богослужіня, вшыткы проходять за запертыма дверями.
Бывшый премєр Петер Пеллеґірні 10-го марца 2020-го року выголосив, же з платностёв од 11-го марца заказує ся в повязаню з боём проти пошырёваня нового коронавірусу, вшыткы публічны богослужіня. Наряджіню ся такой в той день, хоць з выражінём болести, підпорядковали три найвекшы церькви на Словакії – Римокатолицька церьков, Євангелицька церьков авґбурзького віроісповіданя і Ґрекокатолицька церьков.
Православна церьков іщі 10-го марца выдала выголошіня, в котрім выразила, же богослужіня і причастя не можуть быти жрідлом хвороты і так буде публічно служыти далше. О день пізнїше зрушыли публічны богослужіня і православны. Меджі єдным і другым выголошінём православных єпіскопів їх стигнув бывшый премєр скрітіковати за неодповідность і повісти, же на них мінить свій погляд.
Наперед были публічны богослужіня позаставелны до 23-го марца, моментално є ясне, же ся в тім буде продовжовати аж до 31-го марца.
Римокатолицька єрархія уж припустила, же без публічных богослужінь буде тот рік проходити може і Великдень.
Церькви зато забезпечують оналйн высыланя з богослужінь і апелують на віриків, жебы ся духовно спаяли через тоты высыланя із своїма священиками і єпіскопами. Высыланя через соціалны сітї роблять многы священици, ґрекокатолици мають і можливость смотрити богослужіня посередництвом властной телевізії Logos TV, котра высылать через свій Youtube канал з катедралных соборів у Пряшові, Кошыцях, Братїславі, Ужгородї, Пармі (в США), але так само з путницькых місць в Лютинї, Клокочові, Літмановій і базилікы в Михалівцях.
Много з тых жывых переносів можуть люди смотрити і у высыланю локалного телеканалу Televízia Zemplín.
Петро МЕДВІДЬ, ЛЕМ.фм, жрідло фотоґрафії: grkatpo.sk
