23. 4. 2020: Історія уменя у Вігорлатьскім музею

Новый музейный проєкт під назов Історія уменя – то часть онлайн понукы Вігорлатьского музею в періодї, коли музей, подобно як і далшы културны інштітуції з причіны обмеджіня пошырёованя хвороты COVID-19 є про навщівників запертый.

Понука є цїлена про старшу молодеж, штудентів і дорослых з інтересом о спознаваня реґіоналной історії і културне діяня у своїм оточіню.

Історію уменя сприступнив Вігорлатьскый музей в Гуменнім сімболічно почас Світового дня уменя, котрый ся святкує 15-го апріля. В тот день народив ся італійскый умелець Леонардо да Вінчі, автор прославленых образів Мона Ліза ці Тайна вечеря.

Штудіюм і себепрезентація

Цїлём музею є вказати уменя в шыршых сполоченьскых повязанях, приближыти уменя в музейных експозіціях, у выставковых просторах музею, в команатах каштелю і в цїлім просторі реґіону Вышнёго Земпліна, і дати своїм любителям простор на штудіюм, баданя, себепрезентацію і одпочінок.

Mузей забавнов формов представлює вытварне класічне і інсітне уменя в шырокій палетї вытварных жанрів, проявы народного музичного і співацького уменя, а і драматічне уменя, котрых елементы суть повязаны з людьскым жывотом і суть неоддїілнов частёв вывоя цїлой сполочности.

В ціклї повідань о умелецькых творах музей позывать людей ку діалоґу о основі уменя – о значіню і потребі уменя, о слобові умелецького прояву, ёго підпорі і розвитку, о цїлосполоченьскім значіню уменя і непояснительной енерґії уменя в конкретных жывотных сітуаціях людей.

Конкурзны задачі і реґіоналны авторы

Вігорлатьскый музей выбрав творы і авторів з цїнной образовой і умелецькой збіркы свого умелецько-історічного фонду од 17-го по 20-те столїтя, творы з ґалерійного фонду музею з одказом на реґіоналных авторів, як і збіркы народного уменя етноґрафічного фонду. На фонї історічных дій приближує, чім были умелецькы творы про їх авторів і маїтелїв, хто были їх музы, як і чом выникли, з якым посолством ся ку людём пригваряють і што вшытко ся з них днешнїй чоловік може дізнати.

Цїлый новый проєкт мож найти на вебовых сторінках Вігорлатьского музею в Гуменнім. Історія уменя є о уменю спознавати, учіти ся і розуміти світу коло себе.

Музей буде давати людём і конкурзны задачі, котры ся будуть оцінёвати все в 15-ый і посліднїй день в місяцї. Апрілёва задача черьпать з творчости і посолства двох умелїів реґіону – академічной малярькы Олґы Бугаёвой і професора, академічного маляря Станїслава Станкоція.

Станїслав Станкоцій

Станїслав Станкоцій (1959 р.) є родак з русиньского села Гостовицї. Є вытварник, дізайнер, ґрафік і педаґоґ.

Штудовав на Середній умелецько-промысловій школї в Кошіцях, пак ґрафіку на Высокій школї вытварных умень в Браїславі. Абсолвовав і штудії в Паріжі і Гелсінках. Є професором на Высокій школї вытварных умень в Братїславі, моментално є у функції проректора і ведучого Ательєру Ідентіта.

Выставлёвав свої творы на веце як 70-ох колектівных і 40-ох персоналных выставках в різных країнах Европы і в Канадї. Здобыв веце оцїнїнь, наприклад,  за найкрасшу книжку Словакії ці найкрасшый календарь. Ґалерія міста Братїславы о нїм выдала і моноґрафію.

Петро МЕДВІДЬ, ЛЕМ.фм