23. 3. 2022: В Меджілабірцях одсвяткують Світовый день Русинів

Днесь, 23-го марца,  припоминаме собі Світовый день Русинів. Тото свято будуть короткым проґрамом праздновати в Меджілабірцях, де проходив 1-ый Світовый конґрес Русинів у 1991-ім роцї.

Цїлосвітове свято было схвалене у 2017-ім роцї Світовым конґресом Русинів (СКР), котрый одбыв ся у хорватьскім Осієку. Датум быв выбратый так, жебы припоминав, же 23-го і 24-го марца 1991-го року в Меджілабірцях одбыв ся першый конґрес.

Хоць Світовый день Русинів быв выголошеный у 2017-ім роцї, затля офіціално святковав ся лем раз, у 2019-ім роцї.

Світова рада Русинів вєдно із Русиньсков обродов на Словеньску і містом Меджілабірці втогды зорґанізовали в Меджілабірцях святочну академію. На події брали участь Русины із Словакії, Польщі, Мадярьска, Румунії і Сербії, участь брав і председа Світового конресу Русинів Штефан Лявинець.

Рокы 2020 і 2021, котры были пандемічны, не жычіли тому, жебы мож было праздновати тото свято даякым офіціалным културным проґрамом.

Тот рік Русиньска оброда на Словеньску вєдно із містом Меджілабірці приготовили короткый проґрам, котрым собі Русины припомянуть їх цїлосвітове свято і єдночано 31-шу рочніцю Світового конґресу Русинів. Подія зачне процесіёв од основных школ аж ку Дому културы, де першый конґрес одбыв ся, продовжовати буде проґрам положінём квітя ку памятній таблї (на фотцї), яка припоминать тоту вызначну історічну дію, і приговорами. Выступати будуть і дїти з основных школ.

Окрем Світового дня Русинів окремы членьскы державы мають выбраты і свої локалны днї Русинів, котры одказують на даяку історічну дію, яка є повязана в тій державі з Русинами.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.