22. 5. 2023: Юрий Новосільскій та Лешек Можджер остали лавреатами нагороды Академіі Любраньского

Вызначный артиста лемківского походжыня Юрий Новосільскій (посмертно) і віртуоз фортепіану Лешек Можджер отримали нагороду «Divinis et humanis», признавану Фундацийом Академія Яна Любраньского в Познані.

Премія єст признавана за выдатны осягніня в обшыри культуры, штукы, наукы, социяльных та гуманістичных і реліґійных справ, за знаня, фантазию, поставу, котра перекрачат, што звычайне, очывидне і загально приняте.
Лавреатами сут люде, котры выпередили і перевысшыли своі часы, о котрых мож речы, што сут «людми ренесансу».

Нагорода для тых, што лучат «земскє» з «божественным»

Юрий Новосільскій – артиста, педаґоґ, теоретик і критик штукы, філософ і православный теолоґ, єст узнаваный за єдного з найвызначнійшых сучасных малярів і іконописців.

Нагороды были вручены вчера, 21. мая, підчас Свята Академіі Любраньского. Лявдацию в чест Новосільского выголосил знаный православный теолоґ і дипломата Михал Клінґер.

Як мож чытати в поясніню Капітулы Нагороды, Новосільскому медаль признали м.ін з причыны того, же в часах коли культура неохочо звідує о сенс жытя і смерти, а ідеализує неглубокы ексцентризми, його малярство і мысли можут ся вказати спасительныма.

Лешек Можджер то єден з найвыдатнійшых польскых джазовых музиків, віртуоз фортепіану, композитор і аранжер, творця джазовой, імпровізуваной, фортепіановой, клясичной та фільмовой музикы, піаніста світовой клясы.

Лявдацию в чест Можджера выголосила Аґнєшка Дучмаль, выдатна польска дириґентка, перша жена-дириґент, котра выступила на сцені Ля Скаля в Мілані, знана в цілым музичным світі.

Нагороды «Divinis et humanis» признали другій раз. В минулым році отримали іх філософ природы о. проф. Михал Геллер та архітект проф. Славомир Росольскій.

Фундация Академія Яна Любраньского

Фундация Академія Яна Любраньского в Познані была покликана до жытя в 2020 році, жебы «вести культурну, артистичну, едукацийну, наукову і благодійну діяльніст основану на християньскых вартостях, підпераючых розвиток чловека». В своій діяльности Фундация одкликує ся до особы, жытя і діла єпископа Яна Любраньского (1456-1520), з той інспірациі зродила ся ідея шторічной нагороды «Divinis et humanis». Медаль запроєктувал і зробил краківскій артиста Мацєй Зыхович інспіруючы ся фреском «Афіньска школа» Рафаеля Санті.

Наталія МАЛЕЦКА-НОВАК, ЛЕМ.фм. Фот. Wojciech Pędzich, CC BY 4.0, via Wikimedia Commons