22. 3. 2022: Припоминаме сі 90 років од народжіня а 15 років од смерти русиньского умелця ЮРІЯ КРЕСИЛЫ

Юрій Кресила (Juraj Kresila) нар. 13. 4. 1932 у Михайлови втогдышнёй Чехословакії, теперь на теріторії Словакії, умер 22. 3. 2007 у Пряшові на Словакії. Быв русиньскым вытварным умелцём і высокошкольскым педаґоґом.

Ю. Кресила учів ся в Учіліщу вытварного і промыслового уменя в Угорьскім Градіщу на Моравії (1951 – 1955) і Высокій школї вытварных умень у Братїславі (1955 – 1961). На высокій школї быв ёго учітелём далшый русиньскый вытварный умелець Дезідерій Міллый.

Ю. Кресила учів малёваня на Філозофічній факултї у Пряшови Універтзіты П. Й. Шаварика в Кошіцях (1961 – 1963, 1967 – 1978) і на Высокій школї вытварных умень у Братїславі (1978 – 1990), ту став доцентом у 1978 роцї. Потім ся вернув до Пряшова.

Найвекшу славу Ю. Кресила здобыв за свої портреты, фіґуралны композіції і акты. Штіл умелця характерізують контрастны фарбы і ясны контуры. Майстер створив тыж великого розміру мозаікы про верейны будовы міст на выходній Словакії. В послїднїх роках малёвав главно закутины країны, де жыють Русины, в тым чіслї і тіпічны деревяны церьковцї.

Почас років творчости представив ся на многых персоналных і колектівных выставках на Словакії і за єй граніцями. Од 1989 р. брав участь на выставках русиньскых вытварных умелцїв на Словакії і в загранічу. Меджі іншыма і на І. Біенале русиньскый малярів у Шарішскій ґалерії в Пряшові, котра была частёв културного проґраму 7. Світового конґресу Русинів у 2003 р.

Здобыв і ряд оцїнїнь, єднов із них была Перемія председы Пряшівского самосправного краю у 2016 р.

Здрой: Мґр. Александер Зозуляк, „Енциклопедія історії та культури карпатських русинів“ зоставителїв П. Р. Маґочія і І. Попа, Ужгород: Видавництво В. Падяка, 2010, с. 376, переклад із україньского языка: А. З.