22. 3. 2021: 80 років од народжіня педаґоґа і вытварника – Сілвестра Макаї

Сілвестер Макаї (Силвестер Макаї) нар. 29. 3. 1941 у Куцурї (Вайдашаґ, Мадярьско), теперь на теріторії Сербії. Він педаґоґ, скулптор і ґрафік меджі войводиньскыма Русинами.

Закінчів оддїлїня вытварного уменя Высшой педаґоґічной школы в Приштинї у втогдышнїй Югославії. Быв учітелём в Куцурї. Є автором поезії, главно про дїти, причім владіє, подля выслову єдного крітіка, „розумінём і одчутям дїтьской лоґікы‟. Ку дакотрым стишкам С. Макаї „Пироги о три роги‟ (1984) была зроблена музика. Ёго зборник „Одняти од Ступи‟ (1997) не є присвяченый лем дїтям.

С. Макаї знамый як добрый скулптор, ґрафік і іконописець, якого роботы выставляли ся на высше 15 персоналных і колектівных выставках (позн. ред.: у 2017 роцї мав уж за собов 36 самостатну выставку). Ёго бронзовы скулптуры прикрашають дакілько войводиньскых міст, в тім чіслї композіція „Слунко шлєбоди‟ в м. Куцура, бусты занамых народных діятелїв Петра Кузмяка (1986) і Гавриїла Костельника (1995) в Руськім Керестурї.

Література: Сава Степанов, „Глїбоке чутвованє форми‟, Шветлосц, ХХV, 5 (Нови Сад, 1987), с. 673-682.

Александер ДУЛІЧЕНКО, Павел Роберт Маґочій, здрой: „Енциклопедія історії та культури карпатських русинів‟ зоставителїв П. Р. Маґочія і І. Попа. Ужгород: „Видавництво В. Падяка‟, 2010, с. 439, переклад з україньского языка і звыразнїня писма: А. З.