22. 2. 2024: Моніка Кандрачова лавреатков Премії Фра Анджеліко

Кандрачова має у своїм репертоарї русиньскы народны і духовны співанкы.

Як інформовала Пресова канцеларія Конференції єпіскопів Словакії (TK KBS), в Прімаціалнім палацу в Братїславі собі у віторок, 20-го фебруара, перевзяли Премію Фра Анджеліко – покровителя художників, далшы лавреаты в области словесного, вытварного і музичного уменя, котры своёв творчостёв вынятково заслужыли ся о розвиток хрістіаньской културы на Словакії.

Особности нагородила Рада Конференції єпіскопів Словакії про науку, освіту і културу, котру веде ордінарій Озброєных корпусів і озброєных сил Словацькой републікы – римокатолицькый єпіскоп Франтішек Рабек.

За музичне уменя стала лавреатков Премії Фра Анджеліко Моніка Кандрачова, котру знаме як інтерпретку, яка має у своїм репортоарї і русиньскы народны а духовны співанкы.

Торжественне передаваня премій одбыло ся вже 22-ый раз, і брало на нім участь веце єпіскопів латиньского і восточного обряду, умелецька і академічна общіна, представителї церьковного, културного і общественного жывота. На передаваню брав участь і апостольскый нунцій на Словакії Нікола Джірасолі.

В рамках події Моніка Кандрачова і выступала, вєдно із своїм сыном, так само популарным співаком а прімашом Андріём Кандрачом.

Моніка Кандрачова

Народна співачка, лавреатка тогорічной Премії Фра Анджеліко, є на музичній сцены уж дакілько десяток років. Моніка Кандрачова ся народила 26-го януара 1956-го року в селї Дячів, окрес Сабінів, в ґрекокатолицькій русиньскій родинї Яна і Марії Канющаковых. Мама была з дому Штельбаска. Їй уйко Канющак по войнї довгы рокы учітелёвав в русиньскім селї Нижнї Репашы.

Зо співом зачала уж на основній школї. Перше оцїнїня здобыла як дванадцятьрочна на цїлословацькім конкурзї в Пряшові. Почас середнёшкольскых штудій брала участь на цїлодержавнім конкурзї Мелодії приятельства і репрезентовала реґіоналный фолклор в Петербурзї і в Москві.

Увагу на ню звернув редактор братїславского штудія Словацького радіа Ондрей Демо, знамый фолклоріста, і запросив єй на награваня до Братїславы. Так зачала довгодоба і успішна сполупраца з державным радіом. Записы Кандрачовой были выбраты і до меджінародной конкурзной переглядкы радіозаписів Prix musique folklorique de Radio Bratislava в катеґорії автентічного фолклору.

Іщі за штудентьскых часів брала много раз участь і на Маковіцькій струнї, што была в тім часї єдина конкурзна переглядка русиньской і україньской співанкы в Чехословакії. У своїй карьєрї выступала на многых фестівалах дома і за граніцями, ці на властных концертах. Моніку Кандрачову мож знати із многых телевізных проґрамів, а головно з многых албумів, на котрых співать фолклор, но і паралітурґічны співанкы.

Найзнамішы албумы на казетах і на ЦД вышли під назвами: Dze ši, sosničko, rosla (1991); O, Marije, Maty Boža (1993); Narodil sa Kristus v Betleheme (1993), V Nazareti zacvila lelija (1994); Christos voskrese (1994); Na Ľevockej hure dzvon še oziva (1995); V Betleheme novina (1995); Christos prosredi nas (1996); A čija to chyža (2004); Sinu muj, sinu muj (2005); Oj zabava (2009); Najkrajšie koledy (2010); Spievajme Márii (2011); Anjelským pozdravením (2011), Spev je môj život (2012); Moje naj (2013); Pod Tatrami spí Ježiško (2021); Znej pieseň Márii (2023)

Окрім того, сполупрацовала наприклад і на авдіозапсах зо Словацькым народным умелецькым колектівом (Slovenský ľudový umelecký koletív). У 2016-ім роцї дістала Нагороду председы Пряшівского самосправного краю од втогдышнього жупана Петра Худіка.

Найквеша честь про Моніку Кандрачову, а і нагорода, было то, же могла привітати Святішого Отця Йоана Павла ІІ. в Пряшові у 1995-ім році піснёв Божа мати, чіста Дїво. Пізніше, так само співом, у 2021-і році вітала і Папу римского Франціска в Шаштінї і Пряшові.

Премія Фра Анджеліко

Премія Фра Анджеліко одказує на італійского маляря і домініканьского священика, котрого Папа римскый Йоан Павел ІІ. выголосив за блаженого у 1982-ім роцї. Властным меном звав ся Джовані з Фіесоле.

Познатый є вдяка тому, же в Каплічці Николая V. у Ватікані зробив цікл фресок з назвов Судьбы святого Лаврентія і святого Штефана. В монастырю Сан Марко у Флоренції намалёвав фрескы Страшный суд, пізнїше докінчів олтарьный образ Благовіщеніє Дївы Марії в Костелї Сан Доменіко у Фіесоле.

Прославив ся головно образом Корунованя Дївы Марії, і выслужыв собі ним званя Фратер Джовані Анджеліко (Фра Анджеліко). Як єден із найвызначнїшых малярів флорентьской пізной ренесанції став покровителём художників.

Оцїнїня про художників в подобі Премії Фра Анджеліко з боку Конференції єпіскопів Словакії удїлюють ся од 2002-го року. Оцїнёваны суть люде, котры до свойой творчости кладуть хрістіаньскы думкы і цїнности.