21. 4. 2022: В Будапештї посвятять обновлену будову самосправованя

В пятніцю, 29-го апріля 2022-го року, одбуде ся в Будапештї святочна подія. По реконштрукції буде торжественно посвячена обновлена будова Вседержавного русиньского самосправованя.

Як інформовало самосправованя, котре на подію запрошать вєдно із Бібліотеков Русинів Мадярьска імени професора Іштвана Удварія, Русиньскым научным інштітутом імени академіка Антонія Годинкы і Выставнов салов русиньской музейной колекції імени Др. Атаназа Фединця, обновлену будову посвятить ґрекокатолицькый священик отець Михаіл Тіводор.

Подія буде повязана з презентаційов найновішых русиньсых выдань, якы были выдрукованы в Мадярьску. Выданя Вседержавного русиньского самосправованя одпрезентує Михаіл Капраль, ведучій Русиньского научного інштітуту імени академіка Антонія Годинкы.

Якраз Михаіл Капраль недавно выдав дві про розвиток русиньского языка важны публікації. Першов є Зберька правил русинського писаня и выговорёваня про Русинув Мадярщины, другов Карпаторусинські поселеня. Лішта сел и варошув у Централнуй Европі, де днесь бывавуть вадь даколы бывали Карпаторусины.

Выданя, котры суть повязаны із Ференцом ІІ. Ракоціём, буде презентовати Янош Кожняньскый, председа Общества Русинів/Рутенів Мадряьска і Русиньского самосправованя Шарошпотока. О културный проґрам на святочній події постарать ся Віктор Шостак і Александер Дулишковіч.

Подія зачінать о 12.00 год. і будапештаньску будову Вседержавного русиньского самосправованя мож найти на адресі Уліця Дярмат 85/Б.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.