21. 3. 2019: Співы мого роду – 15-ый рочник русиньского співу

В днях од 24 до 26-го марца 2019 буде в містах Гуменне і Меджілабірцї проходити уж 15-ый рочник цїлословацького конкурзу русиньскых народных співанок під назвов Співы мого роду.

Ёго главным орґанізатором є Русиньска оброда на Словеньску в сполупраці з Вігорлатьскым музеём, Пряшівскым самосправным краём, Матицёв словацьков і містами Гуменне і Меджілабірцї.

На конкурзнім фестівалї выступить коло 45 найлїпшых дїтьскых і молодежных співаків русиньскых народных співанок із реґіонів Снина, Меджілабірцї, Гуменне, Пряшів, Стропков, Свідник, Бардеёв і Стара Любовня з музичным супроводом народной музикы членів фоклорных колектівів Хемлон Гуменне, Торіса Пряшів і Пріватной основной умелецькой школы Кудловска Гуменне. На челї народной музикы будуть Мґр. Арт. Вєрка Гайдукова, членка Штатной філгармонії Кошіцї і Штефан Ґалік.

Окремы выступы співаків буде оцїнёвати фахова жюрї – доц. Владимір Марушін, АртД, державный радця МК СР, педаґоґ Катедры музичной выховы Пряшівской універзіты, Мґр. Ленка Маґурова, ДіС.арт, голосовый педаґоґ і Мірослав Дзіяк, ДіС.арт, педаґоґ музикы. 25-го марца ся од 9.00 і од.11.00 год. одбудуть в Містьскім културнім центрї в Гуменнім два фестіваловы концерты. На третїй день ся концерты пересунуть до Меджілаборець, де ся 26-го марца одбуде выховный концерт од 9.00 год. а наконець і ґалаконцерт з оцїнїнём выступаючіх співаків і цїлковым оцїнїнём конкурзного фестівалу, котрый є присвяченый єдній із найлїпшых співачок, нажаль, уж небогій нашій дорогій Марії Чокиновой з Ублї, першій лавреатцї той вынятковок події і буде обогаченый о уведжіня до жывота CD Співанкы Марії Чокиновой.  

Сердечно позываме на концерты вшыткых любителїв русиньскых народных співанок.

-кер-, Народны новинкы інфо Русин, скорочена статя з боку www.rusynacademy.sk