20. 7. 2020: В Чірчі обновлюють стару деревяну хыжу, буде там памятна ізба

Село Чірч в окресї Стара Любовня ся пустило од обновлїня історічной деревяной хыжы. Майже сто років стара деревяна будова перейде великов реконштрукціёв. Як інформовав пресаґентуру TASR староста Михал Дідік, мала бы в ній выникнути памятна ізба.

Чірч на проєкт здобыв 70 тісяч евр. Жебы село могло жадати о дотацію на фінанцованя проєкту з европскых жрідел, мусило здобыти деревяну хыжу до свого маєтку.

„Ословили сьме влстника і пояснили му наш замір, же хочеме деревяну хыжу зреконштруовати і выбудовати в нїй памятну ізбу. Властник быв согласный і мы могли зачати з приготовлїнём проєкту на обнову хыжы,“ повів Дідік. Додав, же думка обновы старой хыжы зродила ся меджі жытелями села, котры єй хотїли сохранити.

Роботы на обнові реалізують робітници сельской фірмы Солиско Чірч, котры поступно вымінять стару стрїху за нову з деревяного шындля. Мінити ся буде і підлога ці перегородкы, котры роками пошкодила спідня вода. Староста підкреслив, же вшытко ся робить в згодї з одказом предків. Кедьже іде о історічну будову, ку обновлїню село жадало і выражіня памяткового уряду в Пряшові.

В памятній ізбі, котра по закінчіню реконштрукції выникне, буде часть експонатів творити автентічне выбавлїня і часть буде походити із пріватных збірок жытелїв села.

Покля в Чірчі в рамках мікропроєкту Мушына – Чірч, сохраньме перед забытьом културу нашых предків обновлять деревяну хыжу, на польскім боцї зреконштрують храм.

Петро МЕДВІДЬ, ЛЕМ.фм, языкова управа: ред. АРК в СР.