20. 6. 2023: Професор Маґочій одпрезентовав у Пряшові історічный атлас Карпатьской Руси

У віторок, 20-го юна 2023-го року, одбыла ся в просторах Словацького народного музея – Музея русиньской културы в Пряшові презентація словацького выданя книжкы Карпатьска Русь. Історічный атлас професора Павла Роберта Маґочія.

Словацька верзія під назвов Karpatská Rus. Historický atlas вышла в 2022-ім роцї у Выдавательстві Пряшівской універзіты в Пряшові, і є перекладом анґліцького оріґіналу, котрый быв надрукованый у 2017-ім роцї в Канадї.

Презентацію публікації за участи автора, професора Маґочія, модеровав доцент Володимір Фенич з Ужгорода. Знамый русиньскый науковець і академік пояснёвав участным на якім прінціпі были роблены окремы тексты і мапы, котры ся в книзї находять, чом собі выберав даны прінціпы, але обговорили ся і далшы темы, котры прямо або непрямо были повязаны з книжков.

По презентації подія продовжовала діскусіёв, в рамках котрой могли участны класти вопросы професорови, котрый моментално передавать лекції на Studium Carpato-Ruthenorum – Меджінародній лїтнїй школї русиньского языка і културы, яка моментално проходить на Пряшівскій універзіті вже єденадцятый раз.

Як професор Маґочій прозрадив в рамках діскусії, моментално рихтує в Канадї, де жыє і є професором на універзітї, до друку далшу свою публікацію, котра має тот раз быти о карпаторусиньскім уменю.

Як сам підкреслив, тота тема іщі окремо не была оброблена в публікації, а притім уменя є про наш народ барз важным елементом. Книга є за ёго словами заміряна на світьске, не церьковне уменя.

О публіклації

Публікація Карпатьска Русь. Історічный атлас професора Маґочія має множество якостных історічных мап, но і текстів.

„Карпатьска Русь ся дословно находить в самім сердцю Европы. Існують докінця два памятникы збудованы в роках 1870 і 1970 у выходній части Карпатьской Руси, котры означують точный ґеоґрафічный центер европского контіненту. Карпатьска Русь є тіпічнов гранічнов теріторіёв, на котрій стрїчають ся ґеоґрафічны, політічны, етноліґвістічны, реліґійны і соціално-кліматічны граніцї,‟ пише ся на окладці публікації.

„Посеред той фасцінуючой розмаїтости маёрітну популацію традічно творили карпатьскы Русины, котры овпливнёвали решту народів жыючіх в їх сусїдстві: Мадярів, Словаків, Поляків, Румунів, Жыдів, Нїмців, Ромів/Циґанів, а в пізнішім періодї Чехів, Українцїв і Росіянів.“

Карпатьска Русь. Історічный атлас дає подля выдавателя чітателёви детайлны інформації о тій вынятковій комплексній теріторії.

Книга має 34 капітол із фаребныма мапами, котры хронолоґічно вказують розвиток нелем на історічній теріторії Карпатьской Руси, але і на шыршій теріторії середнёй Европы. Кажда мапа є доповнена леґендов, котра приближує ґеоґрафічны, етноліґвістічны, културны і історічны повязаня.

Петро МЕДВІДЬ, ЛЕМ.фм, языкова і ґрафічна управа: АРК в СР.