20. 4. 2020: НР СР: Премєр представив проґрамове выголошіня влады, посланцїв вызвав, жебы го брали як сполочный обовязок

Братїслава 20. aпріля 2020 (TASR) – Премєр Іґор Матовіч (на фотцї) (OľaNO) став перед посланцїв Народной рады Словацькой републікы (НР СР) і представив проґрамове выголошіня влады (ПВВ). Посланцїв вызвав, жебы ся не позерли на окремы пріоріты владного проґраму, як на пріоріты конкретной партії, але жебы брали ПВВ як сполочный обовязок. Посланцї Smeru-SD перед выступлїнём премєра охабили пленум.

„Попробуйме наповнити найвеце з того, што сьме людём обіцяли. Руку на сердце, обіцяли сьме того много і буде то хотїти много роботы,‟ повів. Підкреслив, же владна коаліція має в пленумі парламенту уставну векшыну і має шанцу драматічно змінити Словакію. „Мате можность і одповідность і мы сьме вашым средством як влада,‟ адресовав коалічным посланцём з тым, же треба ся держати вєдно.

Матовіч у своїм выступлїню крітіковав попередню владу, котра подля нёго приспіла ку стратї довіры обчанів у ключовых штатных інштітуціях і справедливость. Підкреслив, же то треба змінити. „Попробуйме дати надію, же Словакія ся скуточнї може змінити на країну, де сі в першім рядї  будеме вшыткы перед законом рівны,‟ повів.

Посланцїв Smeru-SD крітіковав, же охабили пленум перед засїданём о важнім документї. Остатных, котры зістали в салї засїданя, означів тых, котры хочуть Словакію посунути допереду своїма візіями.

Проґрамове выголошіня влады має быти подля ёго слов найамбіціознїшым планом на зміну. Вызвав зато посланцїв на коштруктівну діскусію без огляду на партійну приналежность.

Пленум має о владнім проґрамі роковати почас шестой громады парламенту і наслїдно має голосовати о высловлїню довіры владї. На здобытя довіры потребує кабінет холем 76 голосів посланцїв.

Портал Уряду влады СР, перетлумачів із словацького языка, звыразнив писмо і придав фотоґрафію: А. З.