2. 6. 2023: Русинськоє Націоналноє Сято 2023. рока у Маріяповчу
Вседержавноє Русинськоє Самосправованя Мадярщины орґанізовало Русинськоє Націоналноє Сято 27. мая 2023. рока у Маріяповчу. Сего рока Вседержавноє Русинськоє Самосправованя сяткує 25-у рочныцю, зато вубрали сьме особоє місто. Не многі знавуть, же ту, на містї базілікы у ХVII. столїтёви стояла деревляна церьковка, на котру дерево наші предкы принесли з Карпат. Про нас велика радость держати націоналноє сято у містї з русинськыма корінями.
На Націоналнум Сятови были присутнї Єго преосященство Фюлёп Кочіш, митрополіт Гайдудороґськуй митрополії, Др. Іштван Шімічков, предсїдатель фракції ХДНП, Віра Ґіріц, посланик Русинув у Парламентї Мадярщины, Оскар Шестак, предсїдатель рады жупы Саболч-Сатмар-Береґ, Віктор Крамаренко, предсїдатель Вседержавного Русинського Самосправованя Мадярщины, Олґа Сілцер-Ликович, пудпредсїдатель Вседержавного Русинського Самосправованя Мадярщины, Янош Кожнянськый, предсїдатель Общества Русинув/Рутенув Мадярщины и Русинського Націоналного Самосправованя Шарошпотока, Петро Медвідь, радник презідента Словацькуй републикы за русинську меншыну, предсідателї и члены Русинськых самосправовань.
На сятови были присутнї 230 люди.
Проґрама акції
11:00 Ґрекокатолицька Сята літурґія у Базіліцї Сятого Арханґела Михаила.
Правив Єго преосященство Фюлеп Кочіш, митрополіт Гайдудороґськуй Митрополії, сослужали парох о. Ласлов Трещула и сященик о. Михаил Тіводор. На службі співав Мужськый хор Сятого Єфрема по церькувно-славянському и по мадярському языкох.
12:15 Віктор Крамаренко, предсїдатель ВРС отворив Русинськоє Націоналноє Сято.
Привітствена бесїда Др. Іштвана Шімічкова, предсїдателя фракції ХДНП (Християнсько-демократична народна партія) Парламента Мадярщины.
Русинськый гімн.
Передаваня Премії Антонія Годинкы. Премії передавав Віктор Крамаренко, предсїдатель Вседержавного Русинського Самосправованя Мадярщины и Олґа Сілцер-Ликович, пудпредсїдатель Вседержавного Русинського Самосправованя Мадярщины
13:15 Сяточный обід.
Главный покровитель Русинського Націоналного Сята:
Др. Чаба Латорцаі, заміститель міністера, парламентськый держсекретарь.
Покровителї сята:
Др. Іштван Шімічков, предсїдатель фракції ХДНП Парламента Мадярщины,
Віра Ґіріц, посланик Русинув у Парламентї Мадярщины,
Сято пудпорувалы: Фундація Ґабора Бетлена (Мадярщина), Уряд Мадярщины.
Про Маріяповч
У 1696. р. слызила ікона Сятуй Богородицї у Маріяповчі. Вірникы на утренюй не завітали, же рано того новембрового дня стане ся подїя, котра змінить будучность нашуй церьковли, вірництва и мадярськых ґрекокатоликув. Слызила ікона Богоматери – плакали вірувучі, зачали ся свідченя и еґзекуції, приходили паломникы. Змінив ся жывот малого села у Саболчу: царила сяточность и празднованя, онь цісарськый віднянськый уряд занимав ся тым. То было чудо, Бог выявив миролюбіє и опіку.
На слїдувучый рук ікону перенесли до Відня, а ту ся обстало лем чуство утраты сятынї. Айбо 1915. рока слызила и копія іконы у Повчі. Ибо людські вадь політичнї інтересы не годнї перебороти Господа Бога, сердце Миротоцячуй Богородицї. Маріяповч став главнов сятинёв, де Бог дав знак, преподав чудо милосерднуй, нїжнуй и слызячуй любови не лем ґрекокатоликам Саболча, айбо вшыткым ґрекокатоликам Карпатського базена. Се чудо было такым великым, же Маріяповч став сятинёв духовнуй силы и непобідимов опоров віры.
Так став Маріяповч сятинёв и гордостёв нашого ґрекокатолицького народа, де вжек поверьх три столїтя стрічавуть ся люде: Русины, Мадяры, Румыны, Словакы; католикы и другі вірникы. Фарадшаґы паломництва, духовность молитв скапчує люди. У Маріяповчі пропадать свада. Маріяповч чудесный знак Бога, де люде нашого края годнї ся стрічати у мирови и любови. Апоґеём віковуй дїдузнины была Сята Літурґія 1990. рока пуд веденём папы Cятого Йоана Павла ІІ., на котруй ся зучастнили стовкы тысячув вірувучых рузных націоналностюв и конфесій из нашуй державы и загатаря.
Жрідло: Віра ҐІРІЦ, Сілвер КЕРЕСТЕШ, РУСИНСЬКЫЙ СВІТ / RUSZIN VILÁG
(Публікуєме в оріґіналї – мадярьскім варіантї русиньского языка.)
