2. 3. 2023: Дебют Енді Варголя в Саудийскій Арабіі

Енді Варголь то артиста присутный на цілым світі, але дотепер не было на Близкым Сході выставы, котра вказувала бы його творчіст. Експозицию пн. «FAME» вказуют як раз в реґіоні міста Аль-Уля.

Дзеркальны стіны концертовой салі Марая, што находит ся в пустынній обшыри Саудийской Арабіі, блищат ся докладні так само як дискотекова куля клюбу Studio 54, в котрым в 70. роках ХХ ст. бавили ся такы гості як Даяна Росс, Труман Капоте, Шер ци Джекі Кеннеді. В середині того світячого будинку находит ся выстава робіт інчого постійного бывальця Studio 54 – Енді Варголя, котрого срібрна Фабрика в Ню Йорку еманувала подібным блеском.

Блеск, слава, грошы – фурт актуальны темы

«FAME: Andy Warhol in AlUla» то безпрецеденсова подія – перша в істориі выстава Енді Варголя в Саудийскій Арабіі. Выстава громадит даякы з найбарже культовых творів артисты.

Образы Варголя вказуваны сут в рамках другой едициі Фестівалю Штукы АльУля. Выстава лучыт в собі м.ін. варштаты, выселекцийонувану сучасну штуку і велькоформатовы інсталяциі ци муралі. Од 17. лютого/фебруара выставу мож обзерати в Марая – найвекшым на світі будинку в цілости вкрытым дзеркалами. Є то перша така спілпраца Музею Енді Варголя з Пітсбурґа.

«FAME є введіньом до того аспекту творчости Варголя, котрый подля мене найбарже захоплює вельох молодых люди, в тым тіж саудийску молодіж – подорож Варголя, котра зачала ся за дітины, што всмотрює ся в фільмовый екран і зберат реклямовы фотосы, робит ся штораз барже популярна завдякы соспільным медиям. FAME то нагода до дальшого пошырюваня спадковины Варголя через выставу, але тіж цикль выкладів і варштаты серіґрафікы» – оповідат Патрік Мур, директор Музею Енді Варголя.

Выстава підкрислят постійне значыня Варголя для молодого поколіня і вказує рефлексиі над понятьом целебриты, славы, а тіж кондицийом сучасного соспільства. 70 іконічных образів Варголя выставленых в блищачым обєкті має быти заєдно символом змін в королівстві – реформ введеных премєром державы князьом Могамедом Бін Сальмом, з особливым увзглядніньом інвестиций в сектор штукы, культуры і розрывкы.

На експозициі вказуют образы і ґрафікы звізд Голивуд, леґенд спорту, музиків, м.ін. Елізабет Тейльор, Мугаммеда Алі ци Долі Партон, тіж чорно-білы фільмовы портреты осіб приходячых до Фарбикы, описуваны як «screen tests». В окремым поміщыню презентуваный єст і переломный твір «Silver Clouds». Покій выполеный єст металічныма балонами, котры мают заохочувати до затриманя ся і забавы. Інсталяция збогачена є о рідко вказуваны архівальны знимкы, в тым поляроіды з працовні артисты, што хоснуваны были як основа для образів і ґрафік.

Критика західніх медий

Одкрытю выставы в Арабіі товаришыли в медиях i неприхыльны коментарі – критика взглядом рішыня директора Музею Варголя в Пітсбурґу о спілпрацы з Королівством Саудийской Арабіі. Тыкала она факту, што Варголь был гомосексуалистом, а Саудийска Арабія узнає гомосексуализм за злочын, за котрый горозит аж і кара смерти. Патрік Мур, подібні як Саудийчыкы, котры зорґанізували выставу, накликувал до того, жебы зосередити ся на Варголи як артисті, а не на його особистым жытю.

«Енді был артистом, бізнесменом, підприємцьом, медияльным потентатом, а тіж ґейом, але то не вшытко» – повіл П. Мур. «Не кажда выстава повинна або мусит зосереджати ся на каждым аспекті його жытя, бо Варголь был артистом, а не артистом-ґейом» – підкрислил.

Серед вказуваных робіт неє ниякых, котры навязуют до гомосексуализму. Вшыткы были так добраны, жебы зосередити ся на темі славы, статусу, целебрицтва, без контроверсийных аспектів.

Не лем гандльова дестинация

Аль-Уля постарало ся о выставу «FAME: Andy Warhol in AlUla», жебы заістнувати на світовым рынку штукы і культуры. Выстава тішыт ся медженародным заінтересуваньом – видіти єй были представникы близкосхідньой артистичной сцены та реґіональной і медженародной пресы, з котрых вельо першыраз было в Саудийскій Арабіі. Аль-Уля розвиват тіж локальну артистичну сцену, інвестуючы в едукацийны проґрамы ци артистичны резиденциі. До кінця 2024 рока має быти зреализуваный концепт «Wadi Al Fann», што означат Долину Штукы – буде то монументальна выстава в єдній з пустынных долин локальных і медженародных артистів, як Агмед Матер, Джеймс Тарель ци Аґнес Денес.

«Хочеме быти знаны на світі, як єдна з найліпшых артистичных і культурных дестинаций. В Саудийскій Арабіі є вельо молодых креативных артистів, о котрых мало хто знає. Через презентуваня іх вєдно з інчыма артистами даєме ім можніст заіснтувати, а завдякы такым выставам як FAME можут пережыти штоси, чого перше не мали нагоды» – оповідат Філіп Джонс, кєрівник дс. туристикы Королівской Комісиі для Аль-Уля.

«Выстава в партнерстві з Музейом Едні Варголя в Пітсбурґу має служыти навязаню меджекультурового діалоґу» – повіла Нора Альдабаль, директорка дс. штукы і креативного плянуваня Королівской Комісиі для Аль-Уля, урядничого орґану одповідального за зорґанізуваня выставы. «Тисячы років Аль-Уля была місцьом, де цивілизация і ріжнорідны культуры ся стрічали через гандель. Днес тото продолжаме» – додала.

Выставу мож обзерати до 16. мая тр.

Наталія МАЛЕЦКА-НОВАК, ЛЕМ.фм.

(Публікуєме в оріґіналї – лемківскім варіантї русиньского языка.)