2. 2. 2022: Преміёв Дельвиґа оцїнена і наукова робота о Александрови Павловічови

Доцент Факулты журналістікы Білоруськой державной універзіты Серґей Зеленко быв удостоєный Меджінароднов літературнов преміёв імени Антона Дельвиґа (позн. ред. АРК в СР: на фотцї) „За вірность Слову і Отцюзнині“.

Высоке оцїнїня му было удїлене за научно-бадательску роботу з назвов Образ Отцюзнины-Матери в гражданьскій ліріцї Александра Павловіча. Робота была оцїнена в катеґорії Наука і освіта.

Білоруськый ученый Серґей Зеленко штудовав творы єдного із найвекшых русиньскых будителїв і выбрав у них три художны образы отцюзнины. „Каждый із них наповненый є глубокым смыслом і оддзеркалює історію русиньского народа і выходных Славянів,“ пише ся в інформації о оцїнїню білоруського доцента.

Універзіта єдночасно припоминать, же Александер Павловіч жыв у 19-ім столїтю і быв Русином, „общественным дїятелём і представителём народно-ослободжуючого руху“.

В конкурзї тот рік брало участь 52 авторів із Росії, Білоросії і Чорной Горы. Їх художны творы і науковы роботы были оцїнёваны в девятёх катеґоріях і штирёх шпеціалных катеґоріях. Тексты оцїненых авторів-лавреатів будуть опублікованы в зборниках Настоящее прошлое – художественное слово и публицистика і Настоящее прошлое – наука и просвещение.

Оцїнены авторы были торжественно нагороджены в Москві 29-го януара 2022-го року. Діпломы їм вручав главный редактор выданя Литературная газета Максим Замшев.

Меджінародна літературна премія імени Антона Дельвиґа „За вірность Слову і Отцюзнині“ была заснована у 2012-ім роцї. За їй заснованём стоїть якраз Литературная газета. Барон Антон Дельвиґ, по котрім дістала назву, быв першым редактором той ґазеты і приятелём Александра Пушкина.

Главным цїлём проєкту є професіоналне признаня і підтримка авторів, котры занимають ся найлїпшыма традіціями класічной літературы.

Петро МЕДВІДЬ, Лем.фм, ґрафічна і язакова управа: ред. АРК в СР.