2. 10. 2023: «Бесіда» – вересен/жолтен

Пятый тогорічный номер двомісячника Стоваришыня Лемків – «Бесіда», ч. 5 (194) за місяці вересен/жолтен 2023 р. – вышол уж з друку телицкой печатні і доступный є до придбаня.

Часопис просит нас до участи в ближучій ся ХХХІ Лемківскій Творчій Осени. В найсвіжшым номері прочытаме м.ін. статі:

  • Наталия Малецка-Новак, Буде задбана;
  • Дария Кузяк, Лемковина в Вічным Місті!;
  • Петро Трохановскій, …І серед соспільности Курпів;
  • Наталия Малецка-Новак, Была Ватра. Была я;
  • Андрий Копча, В Новым Саді обрадувал XVII Світовый Конґрес Русинів;
  • Павел Коробчак, Вроцлавскы студенты на практиці в Пряшові (3);
  • Севериян Косовскій, Памяти Нестора Репелы, якого голос «одтамале» почули мы як першы;
  • Наталия Малецка-Новак, 180 років од народжыня Матвія Астряба, аполоґеты лемківского языка;
  • Петро Трохановскій, А Вісла дале плыне / A Wisła dalej płynie. 

Традицийно в часописі запознате ся з частю «Новины, не новины – не лем з Лемковины», де поміщено спис найважнійшых подій за період двох остатніх місяців, значыт літній період – сес, якій є бодай найбогатшый в подіі в нашым лемківскым світі.

Дальше познаме пару статій з інчых редакций – урывків з польской і словацкой пресы. В «Бесіды» поміщена фотореляция з тогорічной ґожівской подіі, орґанізуваной тамтышнім Кружком Стоваришыя Лемків – ХХІХ Стріч з Лемківском Культуром. Як видно, о рік буде ювілейна едиция подіі.

Окрем реляциі ведучого Стоваришыня Лемків з посліднього Світового Конґресу Русинів, редакция помістила і саму Резолюцию, яка была принята делеґатами. Єй зміст тыкат ріжных соспільно-політичных положынь Русинів.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 9.00-15.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.

Найновшый номер, як тіж архівальны номеры часопису «Бесіда» годны сте придбати в електронічній версиі на сайті www.stowarzyszenielemkow.pl.

Севериян КОСОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)

Script logo