2. 10. 2022: Кєд осін – добрі мати дашто до чытаня. Нова «Бесіда» вам в тым поможе

Такой все так єст, што часопис Стоваришыня Лемків являт ся перед даком важном подійом, яка орґанізує ся в лемківскым соспільным жытю. Тым разом «Бесіда», ч. 5 (188) за місяці вересeн/жолтен 2022 р. являт ся на хвилю до ХХХ Лемківской Творчой Осени, яка пройде уж 8. – 9. жолтня/октобра в Білянці і Ґорлицях.

Сесе выданя приносит м.ін. реляцию з михалівской Ватры, рецензию цінного языкознавчого выданя (словник Петра Пыртея, выданый на Украіні), як тіж коментар ґу тому, жебы правды інчы не доптали – примір маніпуляциі, што до першого незалежного лемківского часипису по 1989 р., якым як раз была «Бесіда».

В посліднім выданю прочытаме м.ін. статі:

• Редакция – Протест лемківской соспільности;
• Петро Трохановскій, Примір перфідной маніпуляциі;
• Севериян Косовскій, 42. Лемківска Ватра на Чужыні з огньом принесеным з Лемковины;
• Наталия Малецка Новак і Севериян Косовскій: інтервю з др. Єгвеном Місіло;
• Анна Кырпан, Слово о Словнику.

На самым початку найдете спис подій за остатні два місяці – о чым реляцийонує нам част «Новины, не новины – не лем з Лемковины». Почытаме і выімкы з інчых ґазет – польско- і словацкоязычных дописів – ту м.ін. реляциі о 42. Лемківскій Ватрі на Чужыні та Стрічы з Лемківском Культуром, яка одбыла ся з Ґожові Великопольскым. Словацка статя приносит нам кус істориі про Підкапрпатску Русь.

В части «Одышли од нас/Попращали мы» редакция встигла на скоро замістити пращальный допис о бл. п. Гавриілі Бескиді, вірным приятелю Лемків та выдань Стоваришыня Лемків – «Бесіды» і «Лемківского Річника», якій помер хвилю пред друком остатнього номеру.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 9.00-15.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.

Найновшый номер, як тіж архівальны номеры часопису «Бесіда» годны сте придбати в електронічній версиі на сайті www.stowarzyszenielemkow.pl.

Севериян КОСОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)