19. 3. 2022: Засїдав Націоналный совіт Русинів. Списованя людей у Сербії буде в октобрї 2022
Як інформовала аґентура РутенпреС, 14-го марца 2022-го року в Руськім Керестурї одбыло ся 25-те засїданя Націоналного совіту Русинів – самосправного орґану Русинів у Сербії.
На засїданю обговорили ся оцїнкы роботы і фінанцованя з попереднёго року, але так само і планы, котры ся мають выповнити в тім роцї. Главно в рамках орґанізацій, котрых зряджователём є совіт – Заводу про културу войводиньскых Русинів, Новинарьско-выдавательской інштітуції Руске слово і Русиньского народного театру Петро Ризнич Дядя, але і самого совіту.
По двох роках перервы, з причіны пандмії, совіт обговорив і календарь репрезентатівных подій Русинів, в рамках котрого мають ся з орґанізаторами сконзултовати точны терміны акцій. Бісїдовало ся і о слїдуючім Днї Русинів Сербії, котрый ся святкує в януарї.
Централны святкованя все проходять на іншім місцї. Тот рік ся на святочній академії Русины зышли в Новім Садї, подля інформацій аґентуры РутенптеС ся в роцї 2023 буде святковати в Коцурї.
Рік 2022 буде важным нелем про русиньску, але про вшыткы народностны комуніты в Сербії. Белеград перенїс списованя жытелїв із 2021-го на 2022-ый рік. Люде ся будуть списовати в осени, од 1-го до 31-го октобра.
Од резултатів списованя, так як і в іншых країнах, будуть залежати далшы права, котры будуть годны Русины в Сербії мати в будучности. Русинів у Сербії зато чекать кампань перед списованём. Великым неґатівом, котрый може овпливнити резултаты, є реалность, котров є велика міґрація до іншых держав за роботов. Міґрація дотулять ся, самособов, і Русинів.
Народностны меншыны тот рік мали голосовати і у меншыновых вольбах до націоналных совітів, в котрых собі выберають своїх представителїв до того самосправного орґану на далшу каденіцю. Вольбы мали быти в новембрї.
Подля інформацій, котры принїс РутенпреС, вольбы будуть переложены якбач на першу половину 2023-го року. Причінов є списованя жытелїв, кедьже наперед, як інформовала аґентура, є потрібне мати з нёго резултаты. А так само бы не было добре, жебы довєдна робила ся кампань ку списованю, і ку вольбам.
Петро МЕДВІДЬ, ЛЕМ.фм. Ґрафічна і языкова управа: ред. АРК в СР. Жрідло фотоґрафії: РутенпреС.
