19. 12. 2023: Одбыли ся презентації нового выданя книжкы професора Маґочія
Як інформовав голова Карпаторусиньского конзорціума Северной Америкы Ніколас Купеньскый, 9-го децембра 2023-го року одбыло ся далше засїданя конзорціума, в рамках котрого были обговорены події, якы в остатнім часї подарило ся зреалізовати.
Дві події были присвячены новому выданю популарной книжкы професора Павла Роберта Маґочія з назвов Our People: Carpatho-Rusyns and Their Descendants in North America (Нашы люди: Карпатьскы Русины і їх потомкы в Северній Америці).
Округлый стіл у Філаделфії
Карпаторусиньскый научный центер зорґанізовав округлый стіл з нагоды пятого выданя споминаной книжкы почас конференції Асоціації про славяньскы, выходоевропскы і евразійскы штудії у Філаделфії, в штатї Пеннсілванія.
Конференція проходила од 29-го новембра до 3-го децембра 2023-го року. Патріція Крафчік із Еверґріньской державной універзіты порівняла пять выдань той публікації а еволуцію їй наратіву.
Роберт Зекер із Універзіты святого Франціска Ксаверійского аналізовав у своїм рефератї і то, яку роль мали карпаторусиньскы іміґранты в Споєных штатах Америкы в рамках робочого руху. Знамый русиньскый актівіста із Споєных штатів, Річ Кастер, говорив о поглядї Маґочія на народну ідентіту і реліґійный жывот.
Богдан Горбаль із Ню-Йорьской публічной бібліотекы говорив о общественім жывотї Русинів в рамках даной публікації. Ніколас Купеньскый аналізовав вопрос карпаторусиньской америцькой културы і цівілізації.
Як інфомровав Купеньскый, Карпаторусиньскый научный центер планує позберати реакції, одозвы на пяте выданя книжкы, і публиковати їх в академічнім журналі у 2024-ім роцї, в рамках 40-ой рочніцї першого выданя книжкы Нашы люди: Карпатьскы Русины і їх потомкы в Северній Америці.
Мож было стрїтити ся з професором
Присутность професора Маґочія, котрый жыє в Канадї, схосновала і філія Карпаторусиньского общества в Делавер Валлі, у Філаделфії, котра 2-го децембра зорґанізовала з ініціатівы свого председы, Джона Копчі, стрїчу, яка так само была присвячена пятому выданю книжкы.
Стрїча одбыла ся в Ґрекокатолицькій церькви Святого Духа, котра была основана у 1891-ім роцї. О книжцї говорив окрем автора і Патріція Крафчік а Ніколас Купеньскый. По презентації, на котру пришло понад 70 людей, автор підписовав свою свіжу публікацію.
Русиньска родинна вечеря
В тот самый день у Філаделфії Карпаторусиньскый научный центер зорґанізовав і Родинну вечерю, в рамках котрой веджіня центра – Павел Роберт Маґочій, Ніколас Купеньскый і Патріція Крафчік, привітали понад 30 карпаторусиньскых штіпендістів, актівістів і приятелїв орґанізації. Вечеря святочно одкрыла ся русиньсков гімнов Вручаніє.
Як інформовав Карпаторусиньскый конзорціум Северной Америкы, історія орґанізовати такы вечерї сягать до 2015-го року. Меджі гостями все суть люде, котры актівно залучены суть до карпаторусиньского руху і штудій, але і новы люде, котры вступують до того руху, а в будучности могли бы стати членами „родины“.
Подія не є лем вечерёв, але і місцём, де ся діскутує о різных подіях, на котрых гостї брали участь, ці планах до будучности. А главно є то о тім, жебы ся спознати особнї.
„Родина на Родинній вечерї каждым роком розростать ся, і каждый любить схосновати принагоду стрїтити ся із старыма приятелями, а спознати новых,“ пояснили Елейн Русинко і Богдан Горбаль смысел орґанізованя той події.
