19. 12. 2022: В Лютинї посвятили Ґалерію Мікулаша Климчака
Як інформовав Інформачный центер Пряшівской архієпархії, в середу, 14-го децембра 2022-го року, посвятив владыка Петро Руснак, апостольскый адміністратор Пряшівской ґрекокатолицькой архієпархії, просторы новой Ґалерії Мікулаша Климчака в Лютинї.
В єднім із найвызначнїшых путницькых місць ґрекокатоликів на Словакії привітав участных торжественной події містный парох Петер Ілько. У своїм приговорї означів ґалерію за далше місце стрїчі чоловіка з Богом. „Краса зображеных творів вказує на автора, котрый дістав талент од Бога,“ повів у приговорї лютиньскый парох.
В рамках події одбыло ся і одкрытя выставы умелецькых творів, котрых автором є малярь Мірослав Бухер.
Будованя Ґалерії Мікулаша Климчака реалізовало ся од юла 2021-го до юна 2022-го року. Фінанчно выбудованя підпорив сумов майже 173 тісяч евр і Пряшівскый самосправный край в рамках Вызвы про реґіон 2019. Архітектонічный план новой ґалерії є з ательєру архітекта Петра Марцінка.
Ґалерія в Лютинї буде презентовати цїнности реґіону і посередництвом уменя формовати містну комуніту і навщівників. Ґалерія дістала мено по Мікулашови Климчакови (рр. 1921 – 2016), вызначнім малярёви, скулпторови, філозофови і іконописцёви, котрый гордо голосив ся ку Ґрекокатолицькій церькви.
Родак з Гуменного цїле жытя черьпав у своїх творах з традічной візантійской іконоґрафії, і кедь не робив традічны іконы подля церьковных канонів, але мав свій властный унікатный штіл. Ёго іконы окрашають інтерьєр Базилікы мінор в Лютині, але і в многых далшых церьквах на теріторії Пряшівского краю.
Петро МЕДВІДЬ, ЛЕМ.фм. Ґрафічна і языкова коректура: АРК в СР.