18. 2. 2021: Критичный реконесанс лемкознавства. Конференция Польской Академіі Знань

В найблизшый понедільок, 22. лютого/фебруара 2021 одбуде ся важна лемкознавча конференция. Польска Академія Знань – Східньоевропейска Комісия просит на дискусию яка пройде під назвом «Лемкознавство в ХХІ ст. – критичный реконесанс». В онляйн стрічы участ возмут знаны і цінены дослідникы лемківской тематикы.

Участ в конференциі возмут науковці – Лемкы, але і Полякы, дослідникы лемкознавства в ріжных обшырях. Запрошены сут др габ. Олена Дуць-Файфер, специялистка лемківской літературы, основателька і долголітня ведуча лемківско-русиньской філолоґіі на Педаґоґічным Університеті в Кракові, др Богдан Горбаль, історик, якій великє чысло своіх опрацувань публикує по лемківскы хоц бы в Річнику Руской Бурсы і Лемківскым Річнику. Наштоден робітник нюйорской Публичной Бібліотекы.

Окрем того до дискусиі запрошены остали др габ. Ева Міхна, адюнкт в Інституті Американістикы і Польонійных Студий Ягайлоньского Університету в Кракові, яка доцільово занимат ся темом меншын, в тым проблематикы лемківской шлеской нацийональности, др габ. Анджей Зємба, історик Ягайляньского Університету, частый гіст орґанізуваных через Стоваришыня Руска Бурса подій та Даміян Новак, історик, якій занимат ся м.ін. історийом, описами і плянами лемківскых церкви і сакрального будівництва.

Стріча зачне ся о 17.00 год. Ціліст з причыны пандемічных ограничынь буде трансмітувана онляйн за посередництвом плятформы ZOOM – мотузка, якій находити ся буде на сайті www.pau.krakow.pl. Охочых взяти участ в дискусиі просит ся посылати своі зголошыня до понеділька, до 15.00 год. на мейльовый адрес: anna.polanska@pau.krakow.pl. Деталів глядайте за мотузком. Конференция буде трансмітувана нажыво і в радию ЛЕМ.фм.

Севериян КОСОВСКЫЙ, ЛЕМ.фм

(Публікуєме в оріґіналї – лемківскім варіантї русиньского языка.)