18. 11. 2021: Олексій Петров спомянув Русинів і при своїм одкликаню
Закарпатьска областна рада 15-го новембра 2021-го року одкликала з функції дотеперїшнёго председы Олексія Петрова. Посланцї голосовали за одкликаня вже другый раз.
Петров быв у функції од 7-го децембра 2020-го року, перед тым быв преедседом Закарпатьской областной державной адміністрації. Закрпатьска областна рада го одкликала вже 28-го октобра на своїм реґуларнім засїданю, но Петров втогды назвав засїданя нелеґітімным. Тым зачала політічна кріза.
Наконець быв згодный із своїм одкликанём із фунцкії, пожадав о то сам, што посланцї зробили 15-го новембра 2021-го року на своїм міморяднім засїданю.
В приговорї спомянув Русинів
Перед своїм одкликанём ся приговорив посланцём Закарпатьской областной рады. Петров знова непрямо припомянув єствованя Русинів.
„Я не єм скушеный політік, як векшына команды, з котров роблю в области, пришов до областной рады. Як обычайный чоловік роблю хыбы і намагам ся їх оправлёвати, і не ганблю ся просити о пробачіня,“ повів Петров. „Будьте україньскым Закарпатцём, україньскым Мадяром, Русином або Ромом,“ продовжовав дале днесь вже бывшый шеф Закарпатьской областной рады.
Олексій Петров Русинів не споминав першый раз. Бывшый офіцір Службы безпекы Україны русиньску тему вытягнув уж в септемберї, по чім быв такой атакованый в областній радї за „політічне русинство“.
Є то европскый вопрос
Зачатком септембра были на Підкарпатю орґанізованы презентації книжкы Павла Роберта Маґочія „Підкарпатська Русь: формування національної самосвідомості (1848-1948)‟, яка вышла у Выдавництві Валерія Падяка.
Націоналітсты атаковали Олексія Петрова за то, же была доволена презентація в Закарпатьскій областній універзалній науковій бібліотеці Ф. Потушняка в Ужогордї. Петров втогды на своїм фанпедйжі на сїти Facebook написав, же бібліотека сама рїшыть, якы презентації у своїх просторах зорґанізує, і з ёго боку не видить потребным вмішовати ся – доволёвати або заказовати орґанізованя подій, покля они проходять цівілізованым способом.
„Покля бісїдовати о моїй позіції до так званого русиньского вопросу, є абсолутно европскым – обчане мають право на самоідентіфікацію, і ани держава, ани орґаны самосправы не мають в тім перешкоджати. О тім бісїдує і україньска леґіслатіва,“ написав втогды Петров.
Припоминаме, же Русины суть од 2007-го року в Закарпатьскій области Україны узнаны як окрема народностна меншына, хоць на цїлодержавній уровни ся того доднесь не дочекали.
Мґр. Петро МЕДВІДЬ, Лем.фм. Ґрафічна і языкова управа ред. АРК в СР.
