18. 10. 2018: Одбуде ся конференція Русины і Чехословакія
Русины на Словакії в рамках Округлого стола Русинів Словеньска вырїшыли тот рік святковати як Юбілейный рік, 100 років Чехословацькой републікы – державы Чехів, Словаків і Русинів. В рамках того юбілею намагають ся русиньскы орґанізації приготовлёвати і різны події почас цїлого рока.
Найблизшов подіёв присвяченов сторічніцї републікы буде конференція під назвов Русины і Чехословакія. Орґанізаторами події суть Здружіня інтеліґенції Русинів Словеньска і Пряшівска універзіта в Пряшові.
Шість лекцій в двох блоках
Конференція буде роздїлена до двох модерованых блоків. Першый блок буде модеровати знамый на Словакії політолоґ русиньского походжіня Александер Дулеба, котрый быв і у функції председы Округлого стола Русинів Словеньска, історічно як першый председа той платформы.
В ёго блоку буде мож выслухати три лекції. Історік Петер Шворц буде занимати ся темов Русины і їх путь до Чехословацькой републікы 1918 – 1919 рр. Другым выступаючім буде Іґор Ліхтей, котрый на конференції прочітать реферат під назвов Реакція населіня Підкарпатьской Руси на присутность румуньскых войск на їй теріторії в роках 1919 – 1920. Першый блок закінчіть гость із Чеськой републікы Давід Губені. Занимати ся буде темов під назвов Односно воєньско-безпечностных вопросів Підкарпатьской Руси в меджівойновім періодї.
Другый блок буде модеровати Петер Шворц, котрый є і ґарантом конференції, і в тій части буде мож выслухати далшы три інтересны лекції. Юрай Жаданьскый буде выступовати на тему Господарьскы подмінкы на Підкарпатьскій Руси в меджівойновім періодї. Станїіслав Конєчні, котрый буде выступати як другый подля порядку, вязв собі до мерьку тему Чехословакія і вопрос ідентічности русиньского населїня. Маріан Ґайдош закінчіть другый блок лекціёв Русины на Словакії і обновлїня републікы в роцї 1945.
Конференцію привітать універзіта
Кедьже є Пряшівска універзіта сполурґанізатором конференції, якраз в єй просторах буде наукова стрїча і проходити. Конференція Русины і Чехословакія одбуде ся 15-го новембра 2018-го року і зачне о 8.30 год. Вступ є безплатный.
Подія є реалізована із фінанчнов підпоров Фонду на підпору културы народностных меншын.
Петро МЕДВІДЬ, лм.фм