17. 7. 2022: Міністерство фінанцій хоче зрушыти узнесїня о реконштрукції музея Варгола
Роснутя цін запричінило проблему з реалізаціёв реконштрукції.
Мала то быти велика реконштрукція Музея модерного уменя Енді Варгола в Меджілабірцях. Но по трёх роках словацька влада їднать о зрушіню узнесїня, котрым ся на ню придїлила дотація.
Хоць Пряшівскый самосправный край, котрый є зряджователём Музея модерного уменя Енді Варгола, бере реконштрукцію за вынтяково важну, на засїданя влады ся 13-го юла 2022-го року дістала пропозіція резорту фінацній, жебы зрушыти узнесїня о придїлїню дотації на ню. Влада їднаня о тім пунктї натеперь перервала.
Грошы схвалив іщі кабінет Петра Пеллеґріні
На велику реконштрукцію єдиного музея свого тіпу в Европі, і єдного з двох на світї, выдїлила грошы іщі влада Петра Пеллеґріні на своїм выїздовім засїданю в Кежмарку в октобрї 2019-го року в цїлковій сумі 7,1 міліона евр. Музей є в просторах будовы із 1980-років. В рамках великой реконштрукції планує оправити фасаду і просторы музея, прибудовати і надбудовати просторы. Будинок мать мати новы облакы, дверї, стїны зо скла, підлогы, вымінити ся має електроіншталація, воздушна техніка і сістема забезпечіня. Перебудова має принести і розшырїня ґалерії а депозіту, выникнути мають новы ательєры, прибыти бы мали інтерактівны елементы, в планах є і простор про освітнї проґрамы. Просторы ся подля проєкту мають розшырити о три штокы, чім має выникнути простор про розлічны конференції, мултімедіалны презентації, малы сценічны формы ці бісїды. На стрїсї ся раховало з оддыховов зонов у формі амфітеатру. Но цїны од 2019-го року наросли і музей днесь не знать зробити реконштрукцію за суму, котра была втогды владов схвалена.
Жупі залежыть на реалізації
„Пряшівскому самосправному краю залежыть на тім, жебы тот смыслуповный проєкт быв реалізованый. Тоту інвестіцую береме за вызначну і потребну про затрактівнїня міста і реґіону в повязаню з унікатностёв музея і ёго европскым значінём, але і в повязаню з підпоров турістічного руху ці бізнісовы обставины на тій теріторії,“ повіла Даша Єленьова, говоркыня ПСК про аґентуру ТASR. Проєкт раховав зо сумов 7,1 міліона евр. Но почас роблїня проєктовой документації вдяка роснутю цїн на ставебнім рынку підняли ся інвестічны вытраты проєкту о майже 80 процент, значіть на веце як 12,7 міліона евр. „Схвалена подоба проєкту не є в сучасных обставинах реалізовательна, не мож сповнити цїль дотації при схваленых условіях, зато пропонує ся зрушіня даного узнесїня влады,“ пояснило Міністерство фінанцій СР пропозіцію на зрушіня узнесїня. Подля Єленьовой край усвідомлює собі енормне нароснутя розрахунку, но його фіналну суму овпливнили „вонкашні“ факторы. „Замір неґатівно овпливнило веце обстабин, главно пандемічна сітуація, войновый конфлікт на Українї, і з тым повязане скокове нароснутя ставебных цїн,“ повіла Єленёва. Як підкреслила, без фінанчного крытя жупа не може підписати контракт на реалізацію ставбы, і зрушіня узнесїня влады бы край дістало до „цалком складной сітуації“. З Міністерства фінанцій притім уж на рахунок Пряшівского самосправного краю пришло на реконштрукцію шість міліонів евр.
Мали сьте зачати скоріше, твердить резорт
Подля высловів Міністерства фінанцій СР мала жупа публічне обстараваня на проєкт выголосити вже скорїше, кедьже цїлый замір выникнув іщі в 2019-ім роцї. Подля міністерства бы ся так не стрїтили з актуалнов проблемов. В припадї, же влада узнесїня зрушыть, резорт фінанцій рекомендує Пряшівскому самосправному краю жадати о фінанції знова. „Жадость Міністерство фінанцій СР наслїдно штандартно оцїнить у сполупрацї з Інштітутом вартости за грошы,“ інформовав резорт аґентуру. Як підреслив, край затля жадны грошы, котры вже дістав на реконштруцкію, не мусить вертати.
Петро МЕДВІДЬ, ЛЕМ.фм. Ґрафічна і языкова управа: ред. АРК в СР.
Автор фотоґрафії: Ян Штовка, MQEP.
