17. 10. 2021: Ікона Пресвятой Богородіцї з Водіцї буде путовати по єпархії

В 1820-ых роках у Водіцї проходили многы зъявіня.

Як інформує Рутенпрес, з нагоды 160-ой рочніцї іконы Пресвятой Богородіцї з Водіцї, была зроблена копія меншого формату. Ікона буде путовати по Єпархії св. Николая, котра є про віруючіх у Сербії і Чорній Горї і свій центер має в Руськім Керестурї.

При тій проходить Духовна обнова під покровом Матери Божой Водіцёвой, котра в пятніцю, 15-го октобра 201-го року, почала в Парохії св. отця Николая в Руськім Керестурї і тырвала два днї. В недїлю, 17-го октобра, буде ікона з Водіцї однесена до парохії в Старім Вербасї, де ся буде в тот день святковати одпуст. Там буде ікона посвящена владыком Ґеорґійом Джуджаром, єпархом руськокрестурьскым. Із Старого Вербасу піде ікона до далшых парохій єпархії.

Водіця є вызначным путницькім місцём войводиньскых Русинів. Находить ся на теріторії Руського Керестура. У Водіцї мали одбыти ся зъявіня Пресвятой Богородіцї, але і далшы чудесны дїла і уздравлїня.

Із історії Водіцї

Найстаршым документом о Водіцї є писмо священика в Руськім Керестурї Йоана Копчая до крижевацького владыкы із 1827-го року. Він быв найблизшый зъявіням, котры там мали проходити і давать такый опис:

„На теріторії мойой парохії, коло главной драгы, котра веде од Керестура через село Брестовець і Сапар до слободного міста Сомбор, в діштанції 15 минут од села, находить ся студник, котрый моя парохія перед пятёма роками становила на хоснованя путникам. Коло того студника може перед роком, десь в тім самім часї, дакілько тутешніх дївчат, відїло незвычайне зъявіня, котре выдавало із себе тілько світла, же тоты дївчата, перестрашены од блискоты світа, втекли од студника і пішли дале по іншій дорозї, видячі тото зъявіня і з векшой далекости. Кедь ся тоты дївчата вернули домів, повіли о тім зъявіню своїм близкым і людям у селї. Велё з них, ведены звычайным інтересом, пустили ся ку студнику, жебы ся самы пересвідчіли, ці то правда, ці нїт. І досправды, дакотры, із зачудованём і побожным страхом, відїли звізды, якы выходили із воды і выдавали із себе світло як блищачій огень, а так само і даяке тїло, подобне до малой дїтины, котра плавала у водї. Тото ся повторяло і не переставало. Тоты чудесны появлїня, што їх часто відїло много людей в різнім часї, кедь дішли до знаня народа, зробли таке заінтересованя, же днесь уж не лем мої вірны, але і народы, котры нас окружують, ходять ку высше спомянутому студнику, і коло нёго побожно молять ся і співають духовны піснї.“

Перше незвычайне зъявіня было 7-го юла 1817-го року, кедь коло студника ночовав єден робітник. Він мав чути підземный шум, але і відїти чудесно облечену прекрасну панї. По пятёх роках од того стало ся штось омного векше. Зъявіня, котре было у 1822-ім році, принесло заінтересованя о Водіцю по цїлій околіцї.

6-го юна 1822-го року о 11-ій годинї дополудне дві дівкы Єлизавета Рамач і Єлена Віславскі відїли чудесну Дїву барз красно облечену. Зъявіня были барз часты в 1820-ых роках.

Перша комісія про Водіцю выникла у 1830-ім роцї, кедьже там одбывали ся многы зъявіня, але і уздравлїня. Далшы комісії были пізнїше. На жадость керестурьского пароха Янка Ґвождяка, жебы ся могла у Водіцї будовати церьков, владыка крижевацькый 29-го марца 1857-го року просить о інформації віцеархідіякона Бачского Шовша і він 30-го юла вертать і давать свій позітівный вердікт в тім припадї. По тім владыка доволив будованя каплічкы.

Мож іщі спомянути таку дїю. В роцї 1853 на другый день по празднику Сошествія, град побив поля. Од втогды каждый рік на третїй день по тім празднику іде ся з процесіёв до Водіцї.

Петро МЕДВІДЬ, Лем.фм. Ґрафічна і языкова управа: ред. АРК в СР.