17. 10. 2019: Василь Сочка выставлює в родиску свого отця

Як інформовала Карпатська Панорама посередництвом свого глaвного редактора Валерія Разґулова (другый злїва), 15-го октобра 2019-го року одкрыли в Берегові персоналну выставку Василя Сочкы. До Берегова того умелця, пластічного скулптора, запросив ґенералный конзул Мадярьска Матяш Сіладій (третїй злїва).

Сочка выставлює в родиску свого отця, вызначного русиньского діятеля із Підкарпатя, поета, літературного історіка, прозаіка і публістісты Василя Сочкы-Боржавина. Як інформовав Разґулов, мадярьскый діпломат почас одкрытя выставкы вказав ся як добрї познакомленый із творчостьов Василя Сочкы.

Василь Сочка ся народив у 1951-ім роцї в Ужгородї. В дїтинстві навщівлёвав ательєр Золтана Баконія. Хоць мав потрібну освіту, жебы зачати штудовати на художнім учілищу, не было му то уможнено. Хоць пізнїше робив в многых професіях, цїлый час занимав ся творчостёв, роботов над саморозвитком. Аж кедь мав штиридцять років вырїшыв присвятити ся уменю.

Меджі основны матеріалы, з котрыма Сочка робить, належыть наприклад ясень, бук, черешня, сливка, оріх але і бамбус. Як сам говорить, ёго робота є іншпірована сакралнов ґеометріёв, козмічнов гармоніёв, спїнём мужского і женьского прінціпу.

Творы Василя Сочкы находять ся в музеях і пріватных колекціях в Споєных штатах Америкы, Канадї, країнах Шкандінавії, Чеській републіцї, Мадярьску, Нїмецьку, Ізраілю і на Українї. Є лавреатом oбластной премії імени Йосифа Бокшая і Адалберта Ерделія (рр. 2000, 2013). Так само є членом Націоналного общества художників Україны од 1995-го року і Заслуженым майстром народной творчости (2018 р.).

Петро МЕДВІДЬ, ЛЕМ.фм, зрой фотоґрафій: Карпатська Панорама.