16. 9. 2021: Вишла нова кнїжка Ясмини Дюранїн – Женоблоґия

Виривок з рецензиї

…Тексти котри обявени на сайту www.zenoblogija.com, на бокох „Руского слова”, а тераз положени и до кнїжки, маю специфични формат. Гоч су квачени на диґиталну платформу як особне становиско авторки Ясмини Дюранїн, обяви у новинох були, гоч и минимално, лимитирани зоз ушорйовацку политику медийней хижи. Но, то нє значи же авторка нє мала шлєбоду вибора темох и їх интерпретациї, то лєм значело же Дюранїнова мушела випочитовац основни стандарди професиї, а то новинарска писменосц, добре образованє и схопносц овладац зоз тему о котрей пише, и нє менєй важне: поентирац текст. То фундаменти на котрих опарта охрана „Женоблоґиї” од можлївей банализациї. Ґу тому треба доложиц схопни фотомонтажи котри найчастейше були духовита илустрация за авторков текст, цо ефектно заокружовало цалосц блоґерскей обяви.

Дюранїнова пише о своєй фамелиї и каждодньових подїйох през котри „плїва“ вона особнє и єй троме хлопи – супруг и двоме синове. Вшелїяк же шмелосц отвориц дзвери свойого обисца и читачом повесц: ниа, ми так жиєме, маме таки бриґи, таки радосци, розпуки, так ришуєме проблеми… То нє видумани особи, то наисце фамелия Дюранїнових, котра жиє у реалней хижи на брегу у Сримскей Каменїци. Стретаме их на драже, у преходзе, на їх роботним месце, у маркету, на спортских теренох. То конкретна фамелия, чийо дзеци насправди одрастаю и їх одрастанє провадзи мацерово шейсцрочне писанє “Женоблоґиї”.

Єлена ПЕРКОВИЧ, РутенпреС

(Публікуєме в оріґіналї – войводиньскім варіантї русиньского языка.)