16. 7. 2020: Уряд про загранічных Словаків веде Русин Мілан Ян Піліп

Новым председом Уряду про Словаків жыючіх в загранічу став Мілан Ян Піліп. Влада го схвалила в середу, 15-го юла 2020-го року, на своїм засїданю. Інформовала о тім пресаґентура TASR. Піліп є довгорічный русиньскый актівіста.

Уряд про Словаків жыучіх в загранічу дочасно рядив підпредседа уряду Петер Прохацка, по тім, што Ян Варша на основі властной жадости абдіковав із функції председы.

Уряд загранічных Словаків

Уряд про Словаків жыючіх в загранічу забезпечує в спoлуптрацу з Міністерством загранічных дїл і европскых справ Словацькой републікы выконованя державной політікы в одношіню ку Словакам, котры жыють за граніцями, і державну підпору краянів.

Так само коордінує і забезпечує в рамках інформачной сістемы документачне діятельство о краяньскых комунітах.

У проґрамовім выголошіню влады Іґора Матовіча находить ся і часть з назвов Укрїплїня поставлїня Словацькой републікы в Европскій унії і у світї. В тій части меджі важны пріоріты давать влада і підпору актівностей напряменых ку сохранїню културы, традіцій і языка Словаків, котры жыють в загранічу.

Бісїдує ся і о єднакій сумі з державного розрахунку на підпору културных актівностей Словаків у загранічу, яка ся з бюджету давать і на підпору културы народностных меншын. Вопросом є і рїшіня простїшого процесу про здобытя словацького обчанства в припадї загранічных Словаків. Нажаль, тоты правила мають платити лем про Словаків, а не про краянів, за котрых бы Словакія могла брати наприклад і Русинів жыючіх в Сербії ці Хорватії, кедьже їх предкове одышли з нижнёго Земпліна.

Мілан Ян Піліп

Мілан Ян Піліп (1980) закінчів політолоґію і філозофію на Філозофічній факултї Пряшівской універзіты в Пряшові. Є русиньскым актівістом, председом Містной орґанізації Русинськой оброды на Словеньску в Братїславі.

Стояв при выникнутю Округлого стола Русинів Словеньска. В нім быв наперед у функції секретаря, од апріля 2016-го року до фебруара 2017-го року быв председом. Того часу є членом презідідії ОСРС, знова і у функції секретаря. Од децембра 2015-го року є єдным із двох представителїв русиньской народностной меншыны у Выборї про народностны і етнічны ґрупы, і од 2019-го року є підпредседом того выбору.

У 2014-ім роцї быв як незалежный кандідат зволеный до бардеёвского містського заступительства, в нім є посланцём доднесь. У 2018-ім роцї кандідовав і на пріматора міста. Дотеперь быв робітником Міністерства обраны Словацькой републікы. В роцї 2014 му вышла книга під назвов Русиньска народна сімболіка.

У парламентных вольбах в роцї 2020 кандідовав за посланця Народной рады Словацькой републікы як незалежный кандідат на списку партії Sloboda a Solidarita. Быв і співавтором выборчого проґраму той партії за область народностных меншын. До парламенту ся не дістав.

Петро МЕДВІДЬ, ЛЕМ.фм, языкова уіправа: ред. АСРК в СР.