16. 6. 2022: Русины із збіркы Петра Микулы в нашім музею
Як інформовала Яна Трущінька із Словацького народного музея – Музея русиньской културы в Пряшові, 24-го юна 2022-го року одбуде ся вернісаж новой выставы під назвов Русины в збірці образів Петра Микулы.
Петро Микула є довгорічный русиньскый актівіста, член Русиньской оброды на Словеньску а єдночасно і збератель образів. Русиньска оброда є сполуорґанізатором той выставы.
„Фактом є, же зберательство творів візуалного уменя не має на Словакії велику традіцію і ґрунт. В русиньскім середовиску то яв унікатный. І кедь ся з ним стрітиме, збератель часто добровольно зіставанть в аноніміті. Свою збірку концепчно, тематічно і квалітатівно выбрушує, тїшыть ся з нёй. Но коли вырїшыти акуратным способом єй выставити і публічно презентовати, є то у розвитку зберателя якыйсь гранічный пункт. Такый пункт пришов і у русиньского зберателя Петра Микулы з Біловежі, котрый зберательством образів занимать ся вже 20 років, і ёго богата збірка має дакілько сто умелецькых творів,“ інформовала Трущінька.
Колекція Петра Микулы є заміряна на русиньске вытварне уменя. Суть в нїй авторы русиньского походжіня із Підкарпатя і Словакії, главно іде о малярів прославленой Підкарпатьской русиньской малярьской школы. Так само має Петро Микула у своїй збірцї словацькых умелцїв, котры тематічно заминають ся у своїх творах Русинами, главно іде о авторів Кошіцькой модерны.
