16. 5. 2023: Союз писателїв у Сваляві бісїдовав о своїй будучности

Як інформує сайт Русинські писателї Подкарпатя, в суботу, 13-го мая 2023-го року, в просторах Свалявского общества підкарпатьскых Русинів одбыв ся форум славяньскых языків, на базї котрого членове Союзу русиньскых писателїв Закарпатя обговорили планы дїятельства по обновлїню роботы того общества.

Участниками форуму меджі іншыма были председа Свалявского общества підкарпатьскых Русинів Іван Кушнір, членове правліня общества Михаіл Кеменяш, Василь Сакранич і Михаіл Заадяк, членове веджіня Союзу русиньскых писателїв Закарпатя Іван Бинячовскый і Павло Евреш, як далшы членове союзу а гостї.

Лекція Димитрія Попа

Главным орґанізатором і ведучім форуму быв Димитрій Поп, русиньскый славіста, председа Русиньского научно-освітнёго общества. Тот приготовив на форум лекцію на тему Русиньскый язык меджі другыма славяньскыма языками.

В лекції участны могли выслухати о історії походжіня Славянів і їх языка, але і о історії Русинів а їх бісїды. Поп говорив о русиньскім языку, днешнїй ґраматіці ці азбуцї. Порівняв русиньскый язык з іншыма славяньскыма языками, бісїдовав о нюансах, котры дотуляють ся русиньской ґраматікы, і найвекшый акцент клав на азбуку русиньского языка.

Председа вмер перед трёма роками

По лекції участны перешли до основной части форуму – обговорїня далшого фунґованя Союзу русиньскых писателїв Закарпатя.

Член правліня – Іван Бинячовскый, курто поінформовав о сітуації в союзї. Одколи вмер председа орґанізації Михаіл Град, што было перед трёма роками, союз писателїв став подля участных мертвов орґанізаціёв. Так само Бинячовскый інформовав, же двоми членове веджіня написали выголошіня з просьбов выключіти їх з веджіня з тым, же хотять зістати членами орґанізації. Тоты выголошіня Бинячовскый на форумі і прочітав.

Кедьже дві місця у веджіню стали вакантныма, участны провели голосованя, в котрім за новых членів веджіня Союзу русиньскых писателїв Закарпатя выбрали писателїв Мигаля Чикивдю і Юрія Мельника.

Рихтують членьску громаду

На форумі обговорила ся і кандідатура Димитрія Попа на пост головы літературного общества. І кедь членове Союзу русиньскых писателїв Закарпатя были согласны з тым, же Поп може быти достойнов главов орґанізації, рїшыти ся буде аж на офіціалній членьскій громадї.

Было договорено чімскоріше зорґанізовати членьску громаду Союзу русиньскых писателїв Закарпатя, на котрых выберуть собі членове нового председу, а так само будуть рїшыти ся хыбы общеста, але і зачнуть з реалізаціёв вшытко, што было на форумі обговорено.

Петро МЕДВІДЬ, ЛЕМ.фм, языкова і ґрафічна управа: АРК в СР. Фото: Микола Поцко