15. 3. 2017: У Виноградові розбили голову на памятнику Духновіча

Як інформує портал Голос Карпат 15-го марца 2017-го року быв у центрї міста Виноградів пошкодженый памятник вызначного будителя карпатьскых Русинів Александра Духновіча.

Портал у статї дале інформує, же то не было зроблено умыселно. Виноватым за пошкоджіня памятника має быти конарь, котрый нечекано впав на памятник в часї, коли робітници містной комуналной службы зрізовали березы, котры мали конарї над памятником. По тім, што была буста Духновіча пошкоджена, закрыли єй. Редакція ословила і голову Областного културно-освітнего общества Александра Духовіча – Юрія Продана, но тот не хотів цї подію коментовати.

Памятник Александра Духновіча в центрї Виноградова быв перед недавным часом зробленый Василём Беленём. Быв уміщеный лем дакілько десяток метрів од памятника Тараса Шевченка. О благоустроїня простору коло памятнька будителя Русинів на початку того рока постарав ся містный благодійный фонд Виноградів. Моментално не є ясно, ці ся подарить обновити і сам памятник, котрый быв пошкодженый.

Памятник Духновіча у Виноградові не є першым в історії міста. Іщі у 1925-ім роцї тутешня інтеліґенція одкрыла памятник будителёви. Одкрытя было в тім часї великов културнов подіёв цїлого Підкарпатя. Участь на тій події брали многы втогдышнї вызначны діятелї і хоры із Пряшова, Ужгорода і Мукачова. По анексії Підкарпатьской Руси Совєтьскім союзом на місце памятника Александра Духновіча збудовали памятник Сталіна. По одсуджіню култу особности тото місце было порожнє.

Інтересным є, же пошкоджіня ся стало якраз в день, коли націоналістічны україньскы кругы в Закарпатьскій области Україны зачінають святковати 78-му річніцю выголошіня Карпатьской Україны, державы, котра екзістовала єден день, і котрой презідент Авґустін Волошин жадав о покровительство нововиныкнутой державы проукраїньского напряму на теріторії історічной отчізны карпатьскых Русинів націстічне Нїмецько.

Жрідло фотоґрафій: goloskarpat.info

П. М.