15. 2. 2019: Выстава «Енді Варголь: загыбаючы виды звірят» – днес в Ню Йорку бесіда науковців о коренях короля поп-арту

Іде ґу кінцьови період, в котрым мож обзерати выставу, одкрыту 7. жолтня/октобра 2018 р. в Украіньскым Музею в Ню Йорку. То выстава прац выдатного артисты русиньского походжыня – Енді Варголя, а яку складат ся десят ґрафік з сериі «ЕндІ Варголь: загыбаючы виды звірят», котры походят з 1983 рока.

Вчас вернісажу была вказана част, котра была присвячена молодым рокам артисты з Пітсбурґа, де ховал ся в карпаторусиньскым середовиску. Тото же влияло на його еволюцию і дорогу быти знаным світовым артистом. Зато і при експозициі зо славном серийом звірят запрезентувано творы Варголя з молодого періоду творіня, ґу котрым приданы были і деякы приватны артефакты і родинны фотоґрафіі.

Варгольова серия з жывином здає ся перечыти опініі, же вшытко мож купити, або продати, бо мала вказувати на тяжкє положыня дакотрых видів звірят і мала звернути увагу світа на іх загыбаючы ґрупы. Зато вказуваны в Ню Йорку працы інакше представляют русиньского короля поп-арту, якій як раз з комерцийом ся асоциює. Його знаны творы – напр. банька поливкы Кампбель, доляровы банконты і ін.- дополнят творчіст, котра вказує на вражливіст артисты, котрый прібувал припомнути людям, же не лем они єдны жыют на тым світі.

Енді Варголь, малювал портреты славных люди, спосеред котрых вымінити бодай лем такых величанів як Мік Джаґер, Майкель Джексон, Мерилін Монров, або і… Енді Варголь (бо малювал і самого себе), але представляючы звірята, схоснувал тот же артистичный переказ портрету, жебы і они остали героями його творів. Така експозиция, вміщена в портретову серию, мала іщы більший вызвук, вказуючы на проблемы тых видів жывины, котрых онедолга на Земли може не быти.

Выстава «ЕндІ Варголь: загыбаючы виды звірят», котрой вернісаж одбыл ся в році будучым 90. річницьом народин артисты (1928-1987), буде вказувана Украіньскым Музейом в Ню Йорку іщы лем до 17. лютого/фебруара 2019 рока. До того моменту музей зорґанізувал вельо товаришучых выставі акций. 3. лютого/фебруара вказуваный был документальный фільм в режысериі Станіслава Мухы «Absolut Warhola», в котрым режысер іде до Миковой, одкале походит король поп-арту, гостит тіж в Меджелабірцях, в Музею Модерной Штукы Енді Варголя. 9. лютого/фебруара, в рамках музично-поетичной ночы выступували поеты, співакы, композиторы і інструменталисты. В послідній ден експозициі, 17. лютого/фебруара, другій раз буде презнтуваный спомненый документальный фільм, але для охочых дознати ся о Варголи більше, іщы днес, 15. лютого/фебруара, о 19.00 год. (7.00 вечер) за східньоамериканьскым часом, буде проведеный дискусийный панель пн. «Енді Варголь і його карпаторусиньскы корені», в котрым посеред інчых возмут участ знаны русиньскы дослідникы проф. Павел Роберт Маґочій і проф. Елейн Русинко.

Демко ТРОХАНОВСКЫЙ, ЛЕМ.фм