15. 1. 2020: Інтерес о Варголїв музей росне

Актівности музею модерного уменя Енді Варгола в Меджілабірцях ословлюють шторік шыршу публіку. Кількость участных на подіях музею нароснув меджірічно о половину.

З великым успіхом стрїтила ся і експозіція, котра приближовала жывот і творчость Варгола, з котров музей презентовав ся в Мадярьску. Словацьку аґентуру TASR о тім інформовав директор музею Мартін Цубяк.

19 выставок і много далшых проєктів

„Інтерес турістів і навщівників о творчость Енді Варгола росне нелем в нашім музею, але і на выставках, котры орґанізуєме і застрішуєме, ці то на теріторії Словакії або і в загранічу,“ повів Цубяк.

За ёго словами чісло участных на подіях, котры Музей модерного уменя Енді Варгола зорґанізовав у 2019-ім роцї, было 23 239 навщівників. Рік перед тым, як доповнив про порівнаня, мав музей на своїх подіях 16 842 навщівників.

Варголів музей зреалізовав у попреднім роцї 13 выставок у своїх просторах і далшых шість екстерно. Окрем того, приготовило ся множество вытварных воркшопів, лекцій, резіденцій і так само аніматорьскый сімпозій. Найвекшый інтерес у 2019-ім роцї быв за словами Цубяка, окрем головной експозіції творів Енді Варгола, і о выставкы з ціклу Warhol Tour, котры было мож відїти в Левочі, Пряшові і Бардеёві.

„Успішнов презентаційов музею, реґіону але і Словакії была выставка в Мадярьску, в Музею Мігаля Мункачія в Бекеш Чабі з назвов Енді Варгол – На стріберній пути од колыскы по… своёв высоков навщівностёв 12 387 людей і медіалізаціёв,“ повів про аґентуру директор. За успіх музею бере і інавґурацію творів Енді Варгола, Дейвіда Гокні, Стіва Кауфмана і умелця, котрый творить під псевдонімом Банксі. Інавґурація проходила в Меджілабірцях на кінцю 2019-го року, почас нёй ся презентовали і дві публікації під назвами Factor-Y і MMUAW 2.0.

Три стабілны експозіції

Музей має про навщівників три стабілны експозіції. Окрем найвекшов, котра приближує вшыткы важны творчі періоды Варгола, включно ёго домінантных вытварных тем, є там і експозіція презентуюча артефакты, документы і фотоґрафії зо жывота умелця, а так само і выставка презентуюча веце умелцїв поп-арту, стріт-арту, котры Енді Варгола особно знали, іншпіровали ся ним, або надвязали на ёго прямый умелецькый одказ.

Петро МЕДВІДЬ, ЛЕМ.фм