14. 4. 2020: Перед 75 роками зачало свою роботу выдавательство „Руске слово‟

„Руске слово‟, выдавательство („Новинско-видавательна роботна орґанизация „Руске слово‟) – найстарше з єствуючіх і найвекше выдавательство книг і періодік в языку войводиньскых Русинів. Выдавательство зачало своє діятельство у 1945 р. як „Друкарня Рускей матки‟ у селї Руськый Керестур.

Тото змінило свою назву: перше на „Друкарня народного фронта „Руски Керестур‟, пізнїше на Подник друкарів і выдавателїв „Братство єдинство‟, „Видавательно-друкарске подприємство „Руске слово‟, а потім – у 1960 р. „Новинске подприємство „Руске слово‟ Руски Керестур‟. У 1968 р. выдавательска часть оддїлила ся од друкарнї в Руськім Керестурї і перешла до міста Новый Сад, де є дотеперь і носить назву „Новинско-видавательска роботна орґанизация „Руске слово‟.

Почас своёй історії „Руске слово‟ опубліковало понад 250 книжок, меджі нима поетічны і прозовы творы войводиньско-русиньскых авторів, літературны антолоґії, етноґрафічны і ліґвістічна штудії, русиньскы словникы і переклады творів іншоязычных авторів. Вадавать пару періодічных выдань, меджі якыма тыжденны новинкы „Руске слово‟ (1951 – ) , літертурно-умелецькый часопис „Шветлосц‟ ( 1952 – ), дїтьскый часопис „Заградка‟ (1947 – ), молодежный часопис „Мак‟ (1972 – ) і каждорічник „Народни календар‟, пізнїше „Руски календар‟ (1957 – ). Директорами выдавательства были такы знамы сполоченьскы і културны діятелї войводиньскых Русинів, як Дяра Варґа, Дюра Латяк, Любомір Рамач, Гелена Медєші і Наталія Дудаш.

Література: Дюра Латяк, „Руске слово‟, 1945 – 1985 (Нови Сад, 1985).

Павел Роберт МАҐОЧІЙ, здрой: „Енциклопедія історії та культури карпатських русинів‟ зоставителїв П. Р. Маґочія і І. Попа. Ужгород: „Видавництво В. Падяка‟, 2010, с. 669, переклад з україньского языка: А. З.