14. 3. 2022: 130 років од заснованя Зєдинїня ґрекокатолицькых русиньскых братств у США

Зєдинїня ґрекокатолицькых русиньскых братств у США (Соєдиненіє греко-кафтолическихъ русскихъ братствъ; Sojedinenije greko-kaftolyčeskich russkich bratstv v S.Š.A.; Grek Catholic Union of Rusyn Brotherhoods in the U.S.A.) – найстарша з братьскых орґанізацій америцькых Русинів,  заснована 14. фебруара 1892 р. у м. Вілкс-Барре (Пенсілванія).

Меджі основны задачі Зєдинїня треба спомянути: споёваня „ґрекокатоликів, котры говорять руськым (позн. ред.: русиньскым) языком“; забезпечіня своїм членам поїщіня в припадї нещастной пригоды в роботї; підпора освіты і будованя школ і церьквей; поміч вдовам і дїтям своїх членів. Главным засновником орґанізації быв подникатель Іван Жинчак (Джон Сміт) (1864 – 1942), меджі ведучіма на челї орґанізації почас довгого часу были: Іван Угрин (1906 – 1912), Михал Югас, старшый (1901 – 1906, 1920 – 1936), Іван П. Секерак (1936 – 1944), Штефан М. Ткач (1944 – 1968) і Юрій Батько (1968 – 1997).

Орґанізація вела притулок про сироты, якый бав заснованый в м. Елмгерст, штат Пенсілванія (1921 – 1948), помагала будованю многых ґрекокатолицькых церьквей і фінанцовала будованя Візантійской католицькой семінарії (1951). У єй рамках актівно робили молодежный і фізкултурный оддїлы під назвов „Соколы‟. Окрем того, орґанізація выдавала русиньскы учебникы про школы  і русиноязычны і анґлоязычны новинкы про дорослых: „Американскій русскій вѣстникъ‟ (1892 – 1952), „GCU Messenger‟ (1952 – 1993), а тыж молодежны выданя „Sokol Sojedinenija = American Russian Falcon“ (1914 – 1936) i „Svit Dʼitej = Свѣт Дѣтей = Childrenʼs World“ (1971 – 1938, 1946 – 1975). Неберучі до увагы свою підпору Амерьцькой-ґрекокатолицькой (візантійской) руськой церькви, Зєдинїня засновало Выбор захраны выходного обряду (Komitet Oborony Vostočnoho Obrjadu – KOVO) (1932 – 1940, якый вів кампанію проти єпіскопови В. Такачови і ёго політіцї заведженя до жывота ґрекокатолицькой церькви в США приписів Ватікану (у т. ч. Целібату кандидатів на священиків).

Зєдинїня брало тыж актівну участь у політіцї европской отчізны, підтримуючі желаня Русинів одностно припоїня ку Чехословакії (1918 – 1919), крітікуючі політіку той країны за неданя автономії Підкарпатьскій Руси (1920 – 1930-ты рокы) і, наконець, выступаючі проти анексії реґіону Совєтьскым союзом (1945). Орґанізація все одшмарёвала ідея, же Русины належать до україньского народу; наопак єй лідры підкреслёвали, же Русины становлять самостатну народность... По 1945 р. і встановлїню комуністічного режіму в Централній Европі Соєдинїня не мало можность підтримовати далшы контакты з отчізнов і наконець стратило інтерес о Русинів у Европі.

В часї найвекшой актівности, у 1929 р., Зєдинїня мало 133 тісяч членів у 1328 філіях. У 2002 р., на 110-ту рочніцю свого заснованя, мало 40 тісяч членів у 96 філіях і цїлковый маєток в сумі 530 міліонів амерьцькых доларів. На зачатку 20. ст. Зєдинїня перенесло своє главне веджіня із выходной до западной Пенсілванії – до міст Гомстед і Піттсбурґ; а од 1987 р. ёго центер быв перенесеный на великый земельный маєток недалеко м. Бівер (Пенсілванія).

Література: Michal Roman, зоставитель, Zoloto-jubilejnyj kalendarʼ Greko Kaft. Sojedinenija v S.Š.A. (Munhall, Pa., 1942); Oportunity Realized: The Grek Catholic Unionʼs First One Hundred Years, 1892 – 1992 (Beaver, Pa., 1994).

Здрой: Проф. Др. Павел Роберт МАҐОЧІЙ, „Енциклопедія історії та культури карпатських русинів“ зоставителїв П. Р. Маґочія і І. Попа, Ужгород: Видавництво В. Падяка, 2010, с. 547-548, переклад із україньского языка: А. З.