14. 12. 2022: Новый Націоналный совіт Русинів є конштітуованый. Председом став Йоакім Рац

Як інформує аґентура Рутенпрес, 12-го децембра 2022-го року было конштітуоване нове шесте скликаня Націоналного совіту Русинів, русиньского самосправного орґану в Сербії.

На засіданю было потвердженых вшыткых 19 мандантів членів нового совіту, котрого склад вышов з новембровых выборів. Мандаты в совіті здобыло пять кандідачных списків. Новый Націоналный совіт Русинів поздоровив на засіданю радник міністра про людьскы і меншыновы права Марін Піуковіч.

За кандідачный список Русины вєдно в новім совіті членами стали Йоакім Рац з Руського Керестура, Микола Кухар з Дюрдьова, Біляна Ковачевіч з Руського Керестура, Нада Хроміш Аничіч із Шіду, Микола Папуґа з Вербасу, Меланія Мали з Коцура, Сашо Палєнкаш, Михайло Пашо, Марія Колошняї з Руського Керестура, і Славіша Сабадош з Нового Саду.

За список Вєдно за Войводину – ОЛЕНА ПАПУҐА мають в совіті мандат на тот функчный період Олена Папуґа з Руського Керестура і Деян Загоряньскый з Вербасу. Список Русиньска будучность має в совіті двох членів – Стевану Самочета з Коцура і Тамару Балоґ з Дюрдьова.

Список За Русинів – Желько Ковач буде в совіті репрезантовати Желько Ковач з Руського Керестура і Наташа Еделіньски з Беркасова. Кандідачный список Руська матка за Русинів має в совіті трьох представителів, котрыма суть Михайло Фейса з Коцура, Славіца Катона і Марія Дорошки з Руського Керестура.

Новый націоналный совіт собі выбрав і свого председу. Тым сав Йоакім Рац, котрый на посаді вычеряв Борислава Сакача.