14. 10. 2020: Театер Духновіча одпремєрує Островского І мудріяш домудрує

Театер Александра Духновіча в Пряшові одпремєрує в днесь, 14-го октобра 2020-го року, о 20.00 год. на своїй Великій сценї пєсу на мотівы Александра Николаєвіча Островского під назвов І мудріяш домудрує. Буде то, якбач, остатнє представлїня в театрї на довшый час.

Русиньскый театер хотїв Островского премєровати іщі в ярьній части попереднёй театралной сезоны. Кедьже од марця были прияти в повязаню з пандеміёв нового тіпу коронавірусу обмеджіня, і были заказаны і театралны выступлїня, драматічный колектів мусив рїшыти о перенесїню датуму премєры.

В октобровім проґрамі театру быв датум премєры пєсы І мудріяш домудрує оголошена на пятніцю, 23-го октобра. Но вдяка новым рештрікціям, котры влада Словацькой препублікы прияла в понедільок, 12-го октобра, театер вже другый раз мусив перенести премєру Островского пєсы.

З дурных ся не треба высмівати…

„З дурных людей не треба ся высмівати, треба выхосновати їх слабости,“ зачінать анотація ку новій пєсї в репартоарї нашого театру.

„Ґлумов знать, як здобыти собі поставлїня. Днесь є важным досягнути го посередництвом тых справных людей. Ґротескова історія о хамтивости і компліментах, в котрій молодый Ґлумов рихтує ся карьєрно поступити з выбрушеным, богатым языком і софістікованыма бісїдами. По стопятьдесятёх роках є пєса Александра Николаєвіча Островского іщі все актуална і зображує днешнїй способ комунікації тых ‚найвысшых‘, де тоты ‚малы‘ знають то добрї выхосновати.“

Головный герой Ґлумов є молодым автором памфлетів, котры крітікують высоку верству сполочности, но сам має амбіції стати єдным з них. Краса, шарм, і маніпулація в пєсї бють ся з наівітов высокопоставленых урядників і богатых людей, зато Ґлумов мусить зробити план, як по хырбетах тых справных людей вылїзти там, де хоче.

Вшыткы ґенерації акторів

Нову пєсу про Театер Александра Духновіча режійно приготовив Матуш Ольга, котрый є на дочках русиньской сцены знамый главно з режірованя пєс словацькых класіків. Пєсу наштудовав скоро цїлый драматічный колектів театру.

В інсценації І мудрый домудрує представить ся цїлый віковый діапазон акторів. За старшу ґенерацію герцїв мож на сценї відїти Светлану Шковранову, Осифа Ткача і Василя Русиняка. Середню ґенерацію представлють Людміла Лукачікова, Ярослава Сисакова, Любомір Міндош, Владиміра Шефанікова і Осиф Пантликаш. В пєсї представлять ся в ролях і акторы молодшой ґенерації як Зденка Кваскова, Ладислав Ладомиряк, Михал Куцер, Володимір Рогач і Мартін Оревець.

Драматурґічно до репертоару театру пєсу приготовила Терезія Міндошова, о переклад сценаря постарав ся Ярослав Сисак.

Александер Островскый

Александер Николаєвіч Островскый (рр. 1823 – 1886), котрого текст обробив Театер Александра Духновіча, быв російскый драматік. У своїх творах замірявав ся главно на жывот московской сполочности.

Творив у періодї реалізму і ёго драматічны творы рахують ся з творами ёго сучасників Лева Николаєвіча Толстого, Фёдора Михаіловіча Достоєвского і Івана Серґеєвіча Турґенєва.

Премєра пєсы І мудріяш домудрує буде на довшый час, якбач, послїднїм высуплїнём нашого театру. Од 15-го октобра вступують до платности новы наряджіня, в рамках котрых є заказане орґанізовати будьякы културно-сполоченьскы події. Платить тыж заказ сходжіня ся веце як шість особ. Охранны маскы знова мусять быти хоснованы і в екстерьєрї.

Петро МЕДВІДЬ, лем.фм, языкова управа: ред. АРК в СР.