14. 1. 2020: Артиста вірный підкарпатскій школі малюваня

Од 15. січня/януара 2020 р. в Закарпатскым Музею Штукы ім. Йосифа Бокшая в Ужгороді буде мож видіти выставу творів Вячеслава Приходька (1904-2011) «In memoriam». Артиста был выхованком русиньского маляря Федора Манайла. Творил в стили підкарпатской школы малюваня.

Очаруваня Карпатами

Вячеслав Приходько вродил ся в селі Золотоноша в черкаскій области 13. січня/януара 1940 рока. Маючы шіст років, разом з родичами замешкали в Ужгороді, котрый остал містом його жытя та творчости. Вячеслав іздил з родичами по цілым поблизкым реґіоні і од наймолодшых років оставал під вражыньом карпатского світа. Барз скоро зачал малювати і од все вязал з тым своє будуче.

Скінчыл Публичну Школу Малюваня, котру основали выдатны русиньскы малярі, а то Адальберт Ерделий та Йосиф Бокшай. Там стрітил Приходько інчого спілтворцю і представника підкарпатской школы малюваня, а то русиньского маляря Федора Манайла. Манайло был його першым, а на все лишыл ся і головным учытельом.

Поворот до Ужгорода

Во Львові в першій половині 60. років ХХ ст. вчыл ся Вячеслав Приходько на Львівскым Інституті Декоративно-Прикладного Кумшту. По школі артиста вернул до Ужгорода. Властивый му гумор, здібніст обсервациі і криску доцінили локальны ґазеты, якы в 60. і 70. роках публикували такой выключні його карикатуры. В остатніх роках перед смертю вчыл малярства на Закарпатксым Артистичным Інституті. Вмер в 2011 р. в Ужгороді.

Вячеслав Приходько выставлял своі образы на індивідуальных і колективных выставах м.ін. в Ужгороді, Мюнхені (Німці), Требішові (Словация) ци Будапешті (Мадяры). Был участником медженародных пленерів. Остал лавреатом преміі ім. Й. Бокшая і А. Ерделия в обшыри карсных штук. В 1990 р. признано му званя Заслуженого Артисты Украіны, а од 2004 р. – Народного Артисты Украіны.

Клясика з аванґардом

Вячеслав Приходько реалізувал ся в ріжных обшырях штукы, был малярьом, ґрафіком, карикатуристом. В малярстві не ограничал ся лем до єдного жанру. Малювал краєвиды, мертву натуру, портреты, жанровы роботы. Лучыл в собі клясику з аванґардом. Приходько не был близкій до абстракцийонізму, але гра кольорів площын на його образах – абстракцийна. Не был тіж близкій реалізмови, але представлял правду жытя в поетицкій спосіб. В образах оддавал тональніст і настрій старого Ужгорода. Фіґуральны композициі прикликуют вражыня первістной простоты, спорідненой з простотом народной естетикы. Роботы Приходька сут гармонійны, што помагат в іх контемпляциі.

Більшіст образів В. Приходька находит ся в колекциі Закарпатского Музею Штукы ім. Йосифа Бокшая в Ужгороді, част в інчых музеях Украіны і приватных колекциях на Украіні і за границьом. Выставу «In memoriam» мож видіти в Закарпатскым Музею Штукы ім. Йосифа Бокшая в Ужгороді до 30. січня/януара 2020 рока.

Наталія МАЛЕЦКА-НОВАК, ЛЕМ.фм   

(Публікуєме в оріґіналї – лемківскім варіантї русиньского языка.)