13. 3. 2021: Продовжують в реконштрукції Любовняньского замку

Обнова Любовняньского замку продовжує. Як інформовала Леа Геілова з оддїлїня комунікації і пропаґації уряду Пряшівского самосправного краю (ПСК), в найблизшім часї буде ся реконштруовати северовыходна стїна і третїй двір.

Геілова інформовала, же цїла реконштрукція бы мала стояти понад 850 тісяч евр. Міністерство інвестіцій, реґіоналного розвитку і інформатізації Словацькой републікы на тот замір дало дотацію 800 тісяч евр, ПСК співфінанцує реконштрукцію сумов 51 тісяч евр.

В Любовняньскім замку находять ся експозіції Любовняньского музея, котрого є край зряджователём. В екстерьєрї, під замком, є сканзен, де мож відїти деревяну архітектуру з реґіону, і з русиньскых сел, включно деревяной церькви.

Главным цїлём проєкту є одстранити гаварійный стан, зреконштруовати і сохранити северовыходну стїну замку, зреконштруовати касарнї із 17-го столїтя і замковый студник-цістерну. Так само ся в рамках тых робот рахує і з археолоґічным баданём, санаціёв терену, одводнїнём ці добудованём замковой стїны з выужытём автентічного матеріалу.

„Очекованый термін зачатку реконштрукчных робот є конець того року. Імплементація проєкту є напланована до 2024-го року,“  інформовала Геілова.

В зреконштруованых просторах Любовняньского музея – замку в Старій Любовнї бы мала пак выникнути інтерактівна археолоґічна експозіція. Формов модерных технолоґій буде навщівникам презентовати автентічный жывот у воєньскых касарнях.

На треїм дворї буде по реконштрукції сколярьскый двір, де буде цїлорочна експозіція соколярів. „Буде ся ту вказовати соколярьске ремесло, буде ту AVES терапія, значіть робота з гендікепованыма навщівниками, будуть ту і творчі варштаты заміряны нелем на соколярьство, але і іншы ремесла як алхіміста, парфінер, коваль, робота зо зілём і подобно,“ доповнила.

Петро МЕДВІДЬ, ЛЕМ.фн, языкова управа і звыразнїня писма: ред. АРК в СР, жрідло фотоґрафії: FB/Ľubovnianske múzeum.