13. 12. 2020: На обнову згорітой русиньской церькви в Празї вызберали уж міліон корун. Буде ся реконштруовати

У верейній збірцї, котру выголосив Маґістрат міста Прага на обновлїня пожаром зниченой Церькви святого Михаіла Архістратига із 17-го столїтя, люде од їй выголошіня на зачатку новембра 2020 вызберали уж понад міліон чеськых корун. Інформовав о тім портал iRozhlas.cz.

Спомянута збірка іщі ани здалека не кінчіть. На обновлїня церькви буде мож жертвовати грошы аж до 4-го новембра 2021-го року.

Давають і десяткы тісяч корун

Руйны церькви з Загародї Кіньскых, котра згоріла 28-го октобра того року, ся теперь документують, пак має выникнути конштрукція, котра буде хоронити части, якы ся сохранили.

Церьков была маєтком міста Прага. Якраз чеське главне місто буде з выужытём збіркы фінанцовати обновлїня храму. „До збіркы залучують ся малы доноры, але і такы, котры давають десяткы тісяч корун. З причіны коронавірусовой крізы вшыткы будеме мати глубше до кешенї, о то веце собі цїню людей, котры уж теперь на обнові деревяной Церькви святого Михаіла Архістратига беруть участь, і вшыткым дякую,“ повіла радна Прагы про културу Гана Тжештікова.

Цїна не є знама

Робітници з Народного памяткового інштітуту зроблять 3D скан руїн храму, пак буде слїдовати ёго конзервація. В найблизшых тыжднях подля порталу одбуде ся коордічна стрїча представителїв головного міста з православным духовным храму, на котрій буде ся рїшыти сполуправа ці поміч з паспортізаціов і обновов інтерьєру.

„Того часу ся не дасть одгаднути, кілько буде цїлково стояти реконштруцкія,“ повів про портал iRozhlas.cz говорця Прагы Віт Гофман.

Храм із 17-го столїтя

Храм із села Великы Лучкы на Підкарпатьскій Руси перенесли до Прагы в роцї 1929, почас 1-ой Чехословацькой републікы, жебы став частёв збірок Народописного музея.

Будова зо шындльовов стрїхов мала три турнї. Храм быв збудованый в бойківскім штілї з елементами народного барока. В інтерьєрї были хосновавы тіпічны фарбы – біла, зелена і червена.

Церьков была комплетно розобрана, перенесена і пак знова поставлена до первістной подобы двараз. В роцї 1793 єй жытелї Великых Лучок продали векшому і богатшому селу – Медведівцям. Ку другому перенесїню дішло в роцї 1929, як вже было спомянуто. Святочне переданя храму жытелям Прагы одбыло ся 10-го септембра 1929-го року. На церемонії быв і ґубернатор Підкарпатьской Руси Антоній Бескид і жытелї Медведівцїв.

Петро МЕДВІДЬ, ЛЕМ.фм, языкова управа: ред. АРК в Ср, жрідло фотоґрафії: iRozhlas.cz