13. 12. 2019: Папа Франціск оцїнив одвагу русиньской єпархії
Папа римскый Франціск в середу, 11-го децембра 2019-го року, оцїнив одвагу русиньской Мукачовской ґрекокатолицькой єпархії, котра перед тридцятёма роками вышла з ілеґаліты по роках пронаслїдованя.
Вірны єпархії, означены в статї як русиньскы католикы, котры путовали до Ватікану, стрїтили ся з Папом в Базиліцї св. Петра із нагоды той округлой річніцї. Інформовав о тім портал Catholic News Agency.
Господь освободив вашу Церьков
„Я радый, же вас можу привітати на гробі святого Петра і вєдно з вами хочу подяковати безконечно доброму Господу, котрый своёв міцнов руков ослободив вашу Церьков спід довгого утискованя совєтьскым режімом,“ повів на стрїчі Папа.
Глава Католицькой церькви так само споминав на предків, дїдів і бабы, отцїв і матери, котры в пріватности своїх обысть і часто під доглядом неприятельского режіму, ріскуючі свою слободу і жывот, передавали науку правды о Хрістови будучім ґенераціям, „котры представлюєте як досправдовый свідок певной віры, жывой віры, католицькой віры.“
Матірь мучеників
Почас десятьлїть совєтьского утискованя было умученых 36 священиків Мукачівской ґрекокатолицькой єпархії. Папа Франціск подяковав підземній церькви за вірность Хрістови почас пронаслїдованя і мученицьтва і повів, же „Мукачівска церьков є матїрёв многых мучеників, котры своёв властнов кровлёв потвердили свою вірность Хрістови, Католицькій церькви і Римскому єпіскопови.‟
Припомямнув і блаженого єромученика, єпіскопа мукачоівского Теодора Ромжу, котрый „в найтемнїшых хвілях вашой історії доказав вести Божый народ євангеліёвов мудростёв і одвагов.“
Папа повів, же при святочній нагодї ся молить ку Господу, жебы охранив Мукачовску єпархію перед покушінями злого і дав їй повный розвиток.
„Кедьже ся ближыме ку Рождественным святам, давам вашых пастырїв і вшыткых вас, милы віруючі, під покров Мукачовской Пречістой Богородіцї і жычу вам Святе Рождество: най у вашых сердцях народить ся Божый Сын,“ закінчів Папа.
Петро МЕДВІДЬ, жрідло фотоґрафії: Vatican News.
